Mga bakunado lang nga vendors makapamaligya

CEBU, Philippines — Gisugdan na kagahapon ang pag-implementar sa palisiya nga bakunado lang nga vendors ang makapamaligya diha sa kadalanan.

Nasayran nga gibase kini sa bag-ong resolusyon sa Garbo Asenso Sumbanan Alyansa (GASA) nga gilangkuban sa vendors diha dalan Colon, Osmeña Boulevard, Manalili ug dugang mga bahin sa uptown ug downtown areas.

Matud ni Raquel Arce, hepe sa Cebu City  Prevention, Restoration, Order, Beautification and Enhancement (PROBE) tipik kini sa pagtamod sa kampaniya sa pagpamakuna sa siyudad aron makabaton og proteksiyon ang vendors batok sa COVID-19.

Giklaro usab ni Arce nga kinahanglang tumanon sa street vendors ang designated nila nga area ug dili kini molapas ug ang minimum health protocols.

Alang sa fully vaccinated nga vendors mamahimo silang makatinda matag-adlaw apan ang vendors nga naa pa lang sa first dose kaupat lang sa usa ka semana sila mahimong makapamaligya.

Dugang ni Arce nga ilang gipananghid sa Department of Interior and Local Government ang operasyon sa vendors basta motuman lang gyud kini sa mga palisiya.

Nasayran usab nga adunay 1,540 ka street vendors ang rehistrado sa GASA.

Sa laing bahin, anaa na sa 80 porsyento sa mga magtutudlo ug mga non-touching personnel sa Department of Education sa Dakbayan sa Mandaue ang nabakunahan na. Si Edgar Espina, usa sa mga tigpamaba sa DepEd sa maong dakbayan nagkanayon nga base sa ilang kataposang natala niadtong Oktubre 19, 2021 anaa na sa 80  porsyento sa 2,300 ka magtutudlo ang hingpit na nga nabakunahan.

Ug 80 porsiyento usab sa kapin 200 nila ka non-teaching personnel ang hingpit usab nga nabakunahan.

Kini isip kabahin sa pagpangandam sa face to face classes bisan pa og walay rekomendasyon ang Dakbayan sa Mandaue nga mahimong kabahin sa pilot testing sa face to face classes.

Sa laing bahin usab, gipabakunahan ang nagkalain-laing construction workers sa Sugbo ni Francis Gerard “Jigger” Selma-Cañedo. Si Cañedo nga maoy presidente sa Cebu Contractors Association ug nitabang sa 14 ka lokal nga kagamhanan sa Sugbo alang sa pagkab-ot sa herd immunity.

Matud pa niya nga maglisod ang mga trabahante sa pagpabakuna gumikan sa ilang schedule sa trabaho hinungdan nga iyang gihangyo ang mga kadagkoan sa kompaniya nga hatagan og higayon nga mapabakunahan ang ilang mga empleyado ug gihangyo usab niya ang lokal nga kagamhanan aron sila malista.

Si Cañedo kanhi presidente usab kini sa Minglanilla Chamber of Commerce ug Rotary Club.

Si Cañedo usa sa mga magpapili pagkamayor sa Lungsod sa Minglanilla uban sa iyang bise mayor nga si Jojo Selma. —Romeo T. Limpangog, Gabriel C. Bonjoc/BDB (BANATNEWS)