Mi-apply sa Balik-Pasada Program nagkaminus

CEBU, Philippines — Nagkaminos na ang mga tradisyonal nga PUJ nga nangaplay sa Balik-Pasada Program sa Siyudad sa Sugbo.

Suma ni Konsehal James Cuenco kinsa chairman sa committee on transportation sa Konseho sa Siyudad sa Sugbo nga sukad gilusad ang programa niadtong Oktubre sa miaging tuig, aduna nay 1,420 ka TPUJ ang nakabalik na sa pagbiyahe.

Aminado si Cuenco nga dili pa gyud igo ang maong gidaghanon sanglit nakita gyud niya nga duna pay daghang pasahero nga maglisud og sakay.

Nasayran nga dunay kapin sa dos mil ka mga TPUJ ang wala kapasar sa roadworthiness test.

Suma pa niya nga dunay mga unit ang wala kapasar sa screening gumikan kay kagang-kagang na kini ug dili na maayo ang kondisyon niini sa pagbiyahe.

'Kasagaran gyud sa mga karaan nga traditional PUJ's nangalata na kay dugay na nga wala kabiyahe," matud pa ni Cuenco.

Giklaro usab sa konsehal nga nagpadayon pa ang pagpanawat nila og aplikasyon alang sa Balik Pasada Program.

Lakip sa mga rason nga minos nalang ang TPUJ kay duna ubang operators ang anam-anam na nga namalhin og modernong PUJ's.

Sa laing bahin gipasalig sa Land Transportation Franchising and Regulatory Board Central Visayas nga walay pagsaka sa pletihan sa rehiyon 7.

Suma pa ni LTFRB-7 Regional Director Eduardo Montealto Jr.  bisan taliwala sa pagsaka sa gasolina ug ubang petroleum products, wala pay ipatuman nga pagtaas sa pletehan.

Dugang pa ni Montealto, wala pa silay nadawat nga petition alang sa pagsaka sa pletihan sa public transport sa rehiyon. —MEL (BANATNEWS)