Mga sementeryo sa Cebu City abli na

CEBU, Philippines — Sugod kagahapon abli na ang mga sementeryo sa Cebu City alang sa mga tawo nga gustong moduaw og sayo sa lubong sa ilahang mga minahal sa kinabuhi.

Ang San Nicolas Catholic Cemetery diha sa dalan V. Rama, Barangay Calamba nga gipadagasn sa San Nicolas Parish ang usa sa mga dako nga sementeryo sa siyudad.

Sa gawas nga bahin sa maong sementeryo makita ang bus sa siyudad diin mao kini ang butangan sa mga tawo nga madakpan gumikan sa paglapas sa health protocols.

Ubos sa Directive No. 10-14-01 nga giluwatan ni Cebu City Acting Mayor Michael Rama, ang mga tawo bakunado o dili gikan sa Oktubre 18 hangtud sa 30, 2021 ug gikan sa Nobiyembre 3 hangtud sa 5, 2021 mahimong makadoaw sa mga sementeryo.

Apan sa Nobiyembre 1 ug 2, 2021 mga fully vaccinated individuals lang ang mahimong makabisita diha sa mga sementeryo.

Ang mga manindahay sulod sa mga sementeryo gibalhin na usab og laing lugar tungod kay anaa sa direktiba nga dili sila tugotan nga makapamaligya diha sa sulod diin adto sila ibutang sa lugar nga 30 meter radius ang gilay-on gikan sa entrada.

Ang mga manindahay nihangyo sa siyudad nga pabalikon sila diha sulod sa sementeryo bisan og gamay’ng lamesa lang ang ihatag kanila gumikan kay menos ang ilang kita kong anha sila sa gawas.

Si Rama nagkanayon nga aduna sila’y ipahigayong meeting sa pag-finalize sa ilang mga plano sa pagsaulog sa adlaw sa mga Santos ug Kalag.

Samtang sa Dakbayan sa Talisay, makita na ang presensiya sa kapolisan sa siyudad diha sa mga sementeryo karong semanaha.

Kini ang gibutyag ni Police Lieutenant Josenilo Abello, deputy chief sa Talisay City Police Station.

Si Abello maoy nangulo sa pagsusi diha sa sementeryo sa Barangay Poblacion.

Matud ni Abello nga nagpaabot sila sa desisyon sa kagamhanan sa siyudad aron ilang ipatuman atol sa mga adlaw sa Santos ug Kalag. BDB (BANATNEWS)