Supply sa shabu sa CV maapektahan

CEBU, Philippines — Posibleng maapektahan ang supply sa ginadili nga drugas sa Central Visayas human sa pagka sakmit sa balor P1.6 bilyon nga drugas sa Cavite sa nilabay nga adlaw.

Kini ang gitug-an sa tigpamaba sa Philippine Drug Enforcement Agency Central Visayas Leia Albiar-Alcantara.

Matud pa ni Alcantara, dako kaayo epekto ang pagkasakmit sa mga ginadili nga drugas, ilabi na dunay mga local distributors ang manguha sa ilang supply gikan sa Luzon.

Sumala pa ni Alcantara, ang operation niadtong sabado sa Dasmariñas Cavite, kung diin nakasakmit ang PDEA og 240 kilong shabu nagpakita kini nga ang gobiyerno seryoso gayud sa ilang anti- illegal drugs operations.

Dugang pa ni Alcantara mensahe kini ngadto sa mga drug syndicate nga nag operate sa nasud ug naghimo sa Pilipinas isip transshipment point nga seryoso sila sa paggukod kanila.

Ang PDEA, sumala pa ni Alcantara, nagpadayon  sa pagsusi sa mga drug personalities sa nasud.

Sa laing bahin, nagmalampuson ang graduation sa rehabilitation program sa 32 ka mga drug surrenderers sa Barangay Duljo-Fatima, Siyudad sa Sugbo sa miaging adlaw nga gipasiugdahan sa Cebu City Office for Substance Abuse Prevention (COSAP) .

Ang maong drug surrenderers nakahuman sa pipila ka buwan nga Community-Based Drug Rehab Program sa COSAP.

Nitambong sa maong kalihokan  ang pipila ka mga  representante sa Philippine Drug Enforcement Agency,Department of Interior and Local Government , Department of Social Welfare and Services, , Duljo Barangay Kapitan Elmer Abella ug mga konsehales, PNP Station 11 PCpl Richard Lauron, ug recovery coaches sa  COSAP.

Kahinumdoman nga sukad nahibalik sa general community quarantine (GCQ) ang Siyudad sa Sugbu, gibalik na sa COSAP ang tanang mga pisikal nga rehab session, home visitation, tree planting, clean-up drive ug uban pa nila nga mga importanteng kalihokan inubanan sa  istriktong health protocols.

Gani ilahang gidasig ang mga naka-enroll sa community rehab program nga magpabakuna batok sa COVID-19 aron makabaton og proteksiyon. —IBM (BANATNEWS)