Ambulant vendors sa Carbon nisusporta sa modernisasyon

CEBU, Philippines — Pipila ka ambulant vendors sa Carbon Public Market sa Siyudad sa Sugbo ang nagmartsa kagahapon isip pagpakita sa ilang suporta sa modernisasyon sa maong merkado.

Gibutyag ni Zosimo Potot, chairperson sa Lavo Seaside Vendors Association sa Carbon nga buot nila nga ipahibalo sa katawhan nga makahatag og kaayohan ang kaugmaran sa Carbon Market tungod kay mahamugaway na unya ang lugar.

Matud ni Potot nga buot nilang ipalanog sa tanan nga dili tinuod ang nikatap nga report nga supak sila sa proyekto.

Gani sa 183 ka ambulant vendors sa Lavo area mayoridad niini nakauyon gyud sa renovation sa merkado.

Nasayran nga naablihan na sa niaging buwan ang Carbon Market Bagsakan Center diin anha ipahimutang ang ambulant vendors samtang nagpadayon ang kaugmaran sa nahisgotang merkado.

Gianam-anam na ang pagpaguba sa karaang stalls apan dili i-demolish ang mga stall kong ang vendors wala pa kini temporaryong kabalhinan.

Nasayran nga niining ulahi lang 36 na ka stalls ang gi-turnover apan kon mapalapdan na kini moabot ngadto sa 544 ambulant vendors ang ipahimutang niini diin ang whole stretch gyud sa Lavo area sa ML Quezon Boulevard.

Sayo pa, gibutyag sa executive director for infrastructure sa Megawide Louie Ferrer nga target nila nga mahan-ay ang dalan ML Quezon sa dili pa ang pasko.

Ang Megawide maoy kompaniya nga nagtrabaho sa modernisasyon sa Carbon Market.

Ug gani ideya sa vendors ang desinyo sa stalls kon mabutangan kini og daghang produkto. — /BDB (BANAT NEWS)