Residente sa Cebu City giingong gigamit nga clinical trial sa bakuna

MANILA, Philippines — Nitumaw karon ang isyu kabahin sa pipila ka residente sa Siyudad sa Sugbo nga giingong maoy gigamit sa clinical trial sa usa ka  brand sa bakuna nga wala pa mapaila  ngadto sa publiko.

Ang konseho sa Siyudad sa Sugbo niawhag sa Department of Health ug Food and Drug Administration nga mohimo og imbestigasyon kalabot niini. Atol sa privilege speech ni Konsehal David Tumulak kagahapon gihisgotan niya ang kalabot sa maong bakuna nga gitawag og WestVac nga naggikan sa  China.

Base sa report nga nadawat ni Tumulak nga ang gustongM mabakunahan sa maong brand sa vaccine gitanyagan og P2,500 ngadto sa P5,000 ug ipaubos sila sa screening diha sa usa ka tambalanan sa dili pa sila bakunahan. Ang maong trial giingong gipahigayon diha sa pipila ka mga residente sa Barangay Labangon, Basak San Nicolas, Basak Pardo, Cogon Pardo, ug Inayawan.

Sa laing bahin, gibutyag ni Dr. Jeffrey Ibones, officer in charge sa Cebu City Health Department nga kapin na sa 4,000 ka batan-on nga nag-edad og 12 ngadto sa 17-anyos ang nagparehistro aron

mabakunahan.

Matud ni Ibones nga ang vaccination sa mga batan-on didto sa kaulohan giingong magsugod sa Oktubre 15, 2021 apan dinhi sa Cebu City wala pay gikatakdang petsa gumikan kay nagpaabot pa sila sa guidelines  Sa Department of Health.

Samtang si Acting Mayor Michael Rama nibutyag nga ubay-ubay na ka pribadong indibidwal ang nipadayag og suporta sa pagpanghatag og prempyo isip incentives sa mga nabakunahan na sa Siyudad sa Sugbo. (BANAT NEWS)