Gwardiya napatay sa swat

CEBU, Philippines — Patay ang usa ka 31-anyos nga security guard human kini napusilan sa mga sakop sa Special Weapons and Tactics sa Cebu City Police Office diha sa security agency nga iyang gitrabahoan sa Jakosalem Street, Barangay Zapatera Street ning Dakbayan sa Sugbo niadtong Lunes sa gabii.

Ang nakalas mao si Ernesto Benedicto, temporaryong nagpuyo sa maong lugar ug lumad nga taga Cagayan De Oro City.

Matud pa ni Police Lieutenant Colonel Wilbert Parilla, Deputy Director for Operations sa Cebu City Police Office, giingong niadto sa security agency ang maong gwardiya kay mokuha sa iyang security bond kay mobalik na kini sa ilang lugar.

Sumala pa ni Parilla, posibleng wala magkasinabot ang tagdumala sa maong security agency ug ang maong security guard kay pabalikon pa kini sunod semana una makuha ang security bond. Matud pa nga gihangyo usab kini nga mosakay nalang sa armored van nga moadto sa Cagayan sunod semana aron makalibre. Gitug-an ni Parilla, wala magdahum ang mga tawo sa security agency nga wala diay kini molakaw kay nitago kini sa kitchen.

Dugang pa ni Parilla nianang pagka-alas singko na sa hapon misulod kini sa armory ug nang lock didto sa sud dayong mando sa mga trabahante nga pagawason sa ilang buhatan.

Tungod niini nanawag sila sa Parian Police Station. Ang mga polis mihangyo kaniya sa pagtahan apan wala gihapon mosanong mao nga nanawag kini sila og SWAT.

Atol sa pag-abot sa SWAT gi negotiate kini ug gituktok apan inay mopatuo giingong nagpabuto kini sa iyang armas hinungdan nga nisumbalik usab og pabuto ang team.

Ang guard naigo kini sa iyang ulo, ug dali nga gidala sa CCMC ug gideklarar nga patay na mga alas nuybe kinse sa gabie. Ang kapulisan mohimo og imbestigasyon kung unsay nakalangay sa paghatag sa gipangayo sa maong guwardiya ug lakip usab ang background niini sa dihang wala pa niundang sa serbisyo. (BANAT NEWS)