Mga bakunado ray tugotang makaduaw sa sam-ang

CEBU, Philippines — Ang Archdiocese of Cebu misugyot ngadto sa Cebu City Emergency Operations Center nga  vaccinated lang nga mga indibidwal ang makasulod sa mga pampublikong sementeryo sa pagsaulog sa Kalag-Kalag karong tuiga.

Apil sa ilang gisugyot nga ablihan ang mga sementeryo gikan sa alas 6 sa buntag hangtod sa alas 6 sa gabii lang, dili sab pasudlan og mga menor de edad.

Kinahanglan lang nga i-presentar ang vaccination card sa mga moduaw sa ilang minahal sa kinabuhi.

Suma pa sa head sa EOC nga si Konsehal Joel Garganera nga naumol ang maong proposal atol ilang panagtigom kauban ang taga Simbahang Katoliko ug ubang departamento sa City Hall. Tinguha ni Garganera nga kun maaprobahan ang proposal, uniporme na ang pagpatuman niini lakip na sa mga pribadong sementeryo.

Dugang unod sa proposal nga labing maayo nga dili magdugay sa suds a sam-ang ang mga moduaw. Duna say plano nga i-skedyul ang pagduaw nga base sa barangay o ba kaha kapilya.

Dugang rekomendasyon nga dunay paghimoon nga  Misa sa sementeryo , duha sa buntag ug laing duha sa hapon.  Kinahanglan usab nga sul-ubon kanunay ang face mask ug imentinar ang social distancing.

Mao kini ang rason nga limitado ra usab ang makasulod sa sementeryo (depende sa gidak-on sa area) aron dili maghuot.    Duna pu’y mag-roving aron mosita sa makalapas sa protocols.

Ang nahisgotang sugyot magkinahanglan pa og pagtugot gikan kang acting Mayor Michael Rama aron mahimoan kini og opisyal nga guidelines o direktiba. (BANAT NEWS