Dul-an 4 mil ka menor nagparehistro aron mabakunahan batok COVID-19

CEBU, Philippines — Dul-an na sa kwatro mil ka mga minor de edad sa Cebu City bang nagparehistro na sa online aron sila mabakunahan batok COVID-19 human gisugdan na ang pagpanglista.

Ang mga minor de edad nga nagpangidaron 12 ngadto sa 17-anyos ning bag-ohay lang gitugotan na mabakunahan. Sa talaan nga gipagawas sa kagamhanan adunay 3,390 ka mga edad 12 ngadto sa 17-anyos ang nagparehistro. Ang 478 sa nagparehistro adunay comorbidities o masakiton.

Matud pa ni Konsehal Dave Tumulak, ang maong listahan pagpangandam kini kung magsugod na ang pagpamakuna alang sa kabataan nga gimando na ni Pres. Rodrigo Duterte.

Ang pagpamakuna apil mga bata natigayon human ang nasud nakadawat na og igong supply sa bakuna ilabi na ang gikan sa Amerika.

Gipaabot ni Tumulak nga karong mosunod nga mga adlaw magpadayon pa ang pagsaka sa gidaghanon sa mga magparehistrong minor de edad.