Pagkatumba sa railings nga nipatay og bata ipaimbestigar

CEBU, Philippines — Si Konsehal Dave Tumulak nimando karon sa pagpahigayon og imbestigasyon kabahin sa insidente sa pagkatumba sa railings diin usa ka 11-anyos nga batang lalaki ang namatay human kini natumbahi niadtong Domingo sa hapon diha sa P. Burgos Street, Barangay Santo Niño, Dakbayan sa Sugbo.

Ang biktima mao si Cris Bryner Ugsang, usa ka street dweller ug anak og manindahay ug kandila.

Matud ni Tumulak nga posibleng adunay sipyat sa pagkabutang sa railings ug posible usab nga nikabyon ang bata sa railings hinungdan nga natumba kini. Si Tumulak nagkanayon nga maong insidente usa ka eye opener diin human og gamit sa railings hiposon gyud dayon kini.

Tumong sa himuong imbestigasyon aron dili na masubli ang insidente ug paghatag usab og leksiyon sa in charge niini.

Si Tumulak nihatag kini og hinabang sa iyang personal nga kwarta ngadto sa pamilya sa bata.

Nunot niini, si Acting Mayor Michael Rama nagkanayon nga mohatag og hinabang ang siyudad ngadto sa pamilya sa biktima ug ang Department of Social Welfare and Services nihatag na usab kini og ayuda.

Matud ni Rama nga ipasusi usab niya ang ubang railings sa siyudad aron dili na masubli ang maong hitabo.

Gikataho nga sa wala pa mahitabo ang insidente nagduwa-duwa ang biktima uban sa iyang manghud  diha sa lugar nga nahitaboan diin swerte ang 4-anyos niini manghud ang nakalawa sa wala pa matumba ang railings.

Nasayran nga ang pamilya sa biktima walay tinguha nga mopasaka og kaso diin gusto lang nila nga mapahiluna og tarong ang bata.

Ang bata ihatud kini sa iyang kapahulayan nga dayon karong adlawa.

Si Kapitan Lourdes ‘Lulu’ Ramirez sa Barangay Santo Niño nagkanayon nga gipasusi dayon niya ang railings nga naa diha sa ilang barangay paglikay nga adunay laing disgrasya nga mahitabo.

Si Ramirez maoy niangkon sa nitso ug pamisa sa bata diha sa simbahan lakip ang snack sa haya niini samtang ang simbahan sa Basilica Minore del Sto. Niño maoy niangkon sa lungon sa bata ilabi na ang pamilya niini sakop sa homeless families. (BANAT NEWS)