P500k incentive, ihatag sa drug cleared brgy

CEBU, Philippines — Makadawat og incentive nga mokabat sa P500,000 ang mga barangay sa Dakbayan sa Mandaue nga ideklarar nga drug cleared.                     

Kini ang gipadayag ni Mayor Jonas Cortes atol sa kickoff ceremony sa gipahigayon nga recognition sa Barangay Bakilid isip labing unang barangay sa siyudad nga gideklarar nga drug cleared sa Regional Oversight Committee on Barangay Drug Clearing (ROCBDC).                 

Una niini 33 ka barangay dinhi sa Central Visayas ang gideklarar sa ROCBDC nga drug cleared barangay ug lakip na niini ang Barangay Bakilid sa Dakbayan sa Mandaue.                            

Nanghinaut si Mayor Cortes nga mahimong sumbanan sa ubang mga barangay ang gihimo nga paningkamot sa barangay Bakilid pagsumpo sa illegal nga drugas.                                    

“This has been a perennial problem nga angay natong tabangan and we’re very fortunate nga multi sectoral approach ang gibuhat through the different sectors, from religious to the barangays,” segun ni Mayor Cortes.                        

Dugang pa niini iyang gihatagan og dakong gibug-aton ang pagsilsil sa kaisipan sa matag usa nga mahimong kabahin sa pagsulbad sa maong katilingbanong problema. (BANAT NEWS)