34 ka balay daplin sa sapa sa Mambaling ipa-demolish
CEBU, Philippines — Niabot ngadto sa 34 ka balay diha sa Barangay Mambaling, Dakbayan sa Sugbo ang ipaubos sa clearing operation sa kagamhanan sa siyudad gumikan kay peligro kaayo ang kahimtang niini panahon sa kusog nga ulan ilabi na nga nahimutang kini duol sa sapa.
Matud ni Konsehal Jerry Guardo nga grabe ang pagtaas sa level sa tubig diha sa maong lugar ilabi na sa panahon nga mobunok ang kusog nga ulan.
Si Guardo kinsa chairperson sa committee on infrastructure sa konseho sa siyudad nagkanayon nga nag-deploy na og heavy equipment diha sa mga apektadong dapit ang Cebu City Department of Engineering and Public Works (DEPW) ug Cebu City Disaster Risk Reduction and Management Office (CCDRRMO).
Gitahasan sa siyudad ang Prevention, Restoration, Order, Beautification, and Enhancement (PROBE) team sa pagguba sa maong mga balay.
Ang tag-iya sa balay nga apektado sa demolition makadawat kini og p35,000 nga hinabang sa siyudad.
Sa laing bahin, tulo na ka adlaw nga wala paagii ang barangay Campo 4 ug Manipis gumikan sa pagtabon sa mga yuta ug bato diha sa karsada.
Ang yuta diha sa nahisgutang lugar nihumok kini tungod sa sunod-sunod nga pag-uwan.
Si Alvin Santillana, pangulo sa City Disaster Risk Reduction and Management Office (CDRRMO) niingon nga posibleng mataudtaoran pa ang ilang pagsira sa dalan gumikan sa nagpadayon nga bati nga panahon.
Base sa report sa Philippine Atmospheric Geophysical Astronomical Services Administration (PAGASA) duha ka bagyo ang ilang gi-monitor. Gabriel C. Bonjoc/BDB (BANATNEWS)
- Latest