Mga health protocol violators gipalimpyo sa mga sam-ang
CEBU, Philippines — Mga tawong nakalapas sa health protocol guidelines sa Siyudad sa Sugbo ang gipalimpyo sa mga sam-ang kagahapon sa buntag isip kabahin sa ilang community service.
Sumala pa sa hepe sa Cebu City Prevention, Restoration, Order, Beautification and Enhancement (Probe) team nga si Raquel Arce nga kapin sa 80 ka violators ang gitunga ngadto sa duha ka grupo ug gipalimpyo sa pampublikong sam -ang sa Pardo (south district) ug sa Cabantan, Barrio Luz (north district).
Nagkaduol na ang pag-obserbar sa Kalag-Kalag busa gipaabot nga mag-anam anam sab pagduaw ang mga tawo sa mga minahal nila sa kinabuhi nga nipanaw na.
Mao kini ang rason labing maayo nga sa sam-ang lang pagabuhaton karong panahona ang community service sa protocol violators.
Base sa komento sa netizens sa mga hulagway nga gi-post ni Arce sa iyang social media account , naputos kini og mga pagdayeg gumikan kay nalimpyo gyud ang mga sam-an nga gilimpyohan sa violators.
Una na nga gitataw sa kagamhanan nga bisan naka-general community quarantine (GCQ) ang siyudad, padayon gihapon nga gipatuman ang istrikto nga pagukod sa violators.
Kasagaran sa mga nangadakpan kay mao ang wala pagsul-ob og face mask ,samtang ang uban kay nakalapas sa curfew.
Ang holding area sa violators sa north district kay didto sa Cogon Ramos Gym , samtang sa south district kay didto sa Labangon Gym.
Giawhag sa kagamhanan ang publiko nga padayon nga tumanon ang health protocols , gani gimintinar gihapon sa kapolisan ang regular nila nga pag-roving aron masita ang mga mosupak sa protocols. —IBM (BANATNEWS)
- Latest