Sunday Early Curfew sa Guadalupe gilibkas

CEBU, Philippines — Gilibkas na sugod  kagahapon sa Barangay Guadalupe ,Siyudad sa Sugbo ang ilang “Sunday Early Curfew” busa makapaninda na og balik og mas taas nga oras ang mga tindahan sa maong dapit sa matag adlaw nga  Domingo.

Kahinumdoman nga naumol ang maong pamaagi niadtong Agosto human gipaubos  ang siyudad sa  modified enhanced community quarantine (MECQ).

Pag-abot sa buwan sa Septiyembre, gi-extend ang early curfew sa maong barangay bisan ubos na ang siyudad sa general community quarantine (GCQ) kun diin ang tumong niini nga makontrolar ang movement sa mga tawo.

Sa nangaging polisiya sa maong barangay, nagsugod sa alas 4 sa hapon ang curfew matag adlaw nga Domingo , ang mga establisamentong sama sa mga botika ug kadtong essential establishments lamang maoy gitugotang magpabiling abli.

Sa paglibkas niini sugod kagahapon , istrikto gihapon ang pagpatuman sa naandan nga curfew sa siyudad nga alas 10 sa gabii hangtod sa alas 4 sa kaadlawon.

Bisan pa man nga giwagtang na ang Sunday Early Curfew , gihingusgan gihapon  sa maong barangay ang pagdili sa pag-inom og ilimnong makahubog sa pampublikong lugar.

Matud pa sa kapitan sa Guadalupe nga si Michael Gacasan nga ipadayon gihapon ang pag-roving ug pag-disinfect sa kadalanan.— IBM (BANATNEWS)