Tulo mag-ilog sa Lone District sa Lapu-Lapu

CEBU, Philippines — Tulo ka mga lig-ong kandidato ang nagpapili alang sa pagka kongresista sa Lone Congressional District sa Dakbayan sa Lapu-Lapu. Ang magtigi mao sila si incumbent Lapu-Lapu City Councilor Michael Dignos

sa Team Deretso ;  Cindi King Lim Chan sa Team Libre nga asawa ni Mayor Junard ‘Ahong’ Chan ug  Atty. Manuel Degolacion.

Magagikan sa tulo ang pilian sa mga Oponganon nga magdala sa ilang tingog ngadto sa hawanan Ubos Balay Balauranan.

Silang Degolacion ug Dignos pulos mga abogado ug pareho nang nakaserbisyo sa siyudad sa managlahi nga kapasidad. Samtang si Chan maoy kasamtangang chairperson sa Tourism Cultural and Historical Affairs Commission sa dakbayan.

Way kontra

Sa pikas bahin, walay kontra pagka kongresista sa unang distrito si Talisay City Mayor Gerald Anthony “Samsam” Gullas.

Matud pa niya nga sa iyang pagkahibawo nga wala nay laing niduso og Certificate of Candidacy (COC) dali siya nga midala sa balita ngadto sa iyang mga apohan. “Buyag intawon, wala koy kaatbang sa umaabot na election pagka Congressman,” sigon pa ni Gullas. Ang iyang apohan nga si kongresista Eduardo Gullas moretiro na sa politika sa edad nga 91 anyos.

Si Samsam miingon nga maayo kini para kaniya tungod kay makatabang siya og dako sa iyang asawa nga si Rhea nga magpapili pagka mayor sa Dakbayan sa Talisay.

Ang atbang sa mga Gullas sa Talisay mao ang ilang kanhi kauban sa Alayon Party nga kasamtangang si bise mayor nga si Alan Bucao.

Si Bucao nibiya sa partidong Alayon gumikan sa mga saad nga wa matuman nga unta siya na ang magmayor sa Alayon.

Apan si Gullas nitataw nga ilang gipaminaw ang tingog sa 22 ka mga kapitan kay si Rhea maoy ilang gustong magmayor. —Gabriel Bonjoc/IBM (BANATNEWS)