Supporters nilang Robredo ug Marcos niabiba

CEBU, Philippines — Mga Sugbuanong supporters ni Vice President Leni Robredo malipayon human nideklarar nga modagan isip presidente sa nasud ug niduso sa iyang certificate of candidacy kagahapong adlawa.

Ang pundok sa mga professional, urban poor, tinun-an ug mga out of school youth gikan sa Barangay Mambaling, Quiot, Buhisan ug uban ang pagkasayod sa balita nahugyaw sa deklarasyon ni Robredo.

Nakita sa maong pundok ang sinseridad ni Robredo moserbisyo tungod kay matud nila dili kini kurakot ug daghan kining nabuhat ug natabangan sa hilom panahon sa pandemya.

Malaumon ang Leni Tanging Pag-asa 2022 Region 7 nga mahatagan siya og kahigayonan modumala sa nasud.

Sa pikas bahin, dili momenus sa 150 ka mga supporter ni kanhi senador Ferdinand “Bongbong” Marcos Jr., gikan sa mga nagkadaiyang sektor ang nagtagbo sa tiilan sa 1st Mandaue- Mactan Bridge bitbit ang ilang mga plaka pagpakita sa ilang suporta sa pagdagan niini isip umaabot nga presidente sa nasud.

Ang maong mga sakop sa nagkadaiyang sector nga gikan sa Dakbayan sa Sugbo, Mandaue, Lapu-lapu ug Cordova nag-abot sa bridge aron ilang ipakita ang ilang suporta kang Marcos.

Gipili sa mga supporter ni Marcos ang maong taytayan isip simbolikong pagpahinumdom sa tanan nga proyekto kini sa iyang amahan nga si kanhi diktador Ferdinand Marcos. Matud pa ni Erik Espina, usa sa mga convenor ang paghimo sa maong kalihukan pagpakita nila sa kaulohan nga daghang nisuporta ni Bongbong.

Samtang si Chito Aragon, convenor usab sa Sugbo, nitug-an nga ang panag-abot sa mga supporters diha sa taytayan agi pagpakita ug pagpahinumdum sa mga Sugbuanon nga ang katukuran niini dinhi nagpasugod sa kalambuan sa Sugbo ug kabisay-an. (BANATNEWS)