Opisyal sa OBO sa Talisay magkonsehal

CEBU, Philippines — Niduso sa iyang certificate of candidacy kagahapon ang opisyal sa Office of the Building Official (OBO) sa Dakbayan sa Talisay.

Si Ariel Araw-araw modagan kini pagkakonsehal sa siyudad sa 2022 election isip independente nga kandidato.

Si Araw-araw nangangkon nga lakip siya nga napilian sa Partidong Alayon apan wala siya makiglambigit sa maong grupo.

Giangkon usab ni Araw-araw nga giimbitar siya sa grupo ni Bise Mayor Alan Bucao apan gipili niya nga mag-independente.

Matud ni Araw-araw nga 30 ka tuig na siya nga nagserbisyo sa Dakbayan sa Talisay uban ni Kongresista Eduardo Gullas.

“Infant pa ang Talisay naa gyud ko. Saksi ko sa Talisay. Dako nakong gugma nga palambuon pa ang Talisay”, matud ni Araw-araw.

Gipadayag ni Araw-araw nga pangandoy niya nga mopadayon sa pagserbisyo apan iyaha unang giuna ang iyang pamilya sa pagpahiluna hangtud nga naabot na ang tukmang panahon.

Si Araw-araw niluwat kini sa iyang katungdanan isip OBO official diin gisumitir niya ang iyang resignation ngadto kang Mayor Gerald Anthony “Samsam” Gullas Jr..

Si Araw-araw maoy ikaduha nga nakaduso og COC sa siyudad.

Ang una nga niduso mao si Reynaldo Salon nga taga Barangay Tabunok.

Sa laing bahin, kanhi mayor sa Lungsod sa Alcantara nga si Benjamin Lobitaña "Benlo" niduso sa iyang COC pagpasubli og pili isip mayor sa lungsod.

Kagahapon sa buntag si Lobitaña uban sa iyang mga kaalyado sa Partido Pilipino sa Pagbabago kinsa niduso usab sa ilang COC nga gilangkuban sa iyang running mate nga si Larry Llenos ug mga kandidato sa pagkakonsehal nga sila si Andres "Tatay" Timtim, Belinia Barino Lobitaña,  Atty. Diomedes Lapus, Engr. Aquim Sanopao Nasibog, Nestor "Erning" Yosores Elarcosa, Candido "Didok" Yosores, Dr. Kean “Beken” Romero ug Romy "Mekaniko" Rusiana.

Samtang sa Lungsod sa Barili nakaduso na usab sa iyang COC si Mayor Julito “Julie” Flores kinsa magpapili sa samang posisyon ubos usab sa grupo nga Partido Pilipino sa Pagbabago.

Uban ni Flores kagahapon sa buntag ang iyang asawa, running mate nga si Ranie Bolo, mga kandidato sa pagkakonsehal nga sila si Rey Joseph Abellana, Andres Alpas, Ramon Ewican Jr., Elma Bargamento, Carlo Tomas Estrada, Anthony Caesar Almogues ug Harjenny Fat.

Subay niini, niduso na usab sa iyang COC si Pablo John Garcia IV anak ni kanhi mayor Marlon Garcia kinsa magpapiling mayor usab sa lungsod uban sa iyang running mate nga si incumbent Vice Mayor Luisito Ponsica.

Si Garcia giubanan kini sa iyang mga iyaan ug uyoan nga sila si Gobernador Gwendolyn Garcia ug 3rd District Congressman Pablo John ‘PJ” Garcia. —Romeo D. Marantal, Rowena D. Capistano/BDB (BANATNEWS)