Araneta mobida sa “Kumbati 11”

CEBU, Philippines — Ang knockout artist sa Omega Gym nga si Christian “The Bomb” Araneta makigsinukmagay ni Arnold “Destroyer” Garde sa Davao City sa main event sa “Kumbati 11” boxing card sa Omega Sports Promotions nga gikatakda karong Oktubre 22 didto sa IPI Sports and Recreational Complex sa Barangay Tingub dakbayan sa Mandaue.

Si Araneta, 26, mihimo og impresyon sa miagi niyang away human iyang gipalukapa si Richard Claveras sa Silay City sud lamang sa usa ka hugna niadtong Hulyo 16 didto sa Tabunoc Sports Complex sa siyudad sa Talisay.

Mao kini ang ikatulong pagkatkat sa ring ni Araneta ning tuiga. Bisan og naka-iskor og knockdown sa katapusang hugna, napilde siya pinaagi sa sikit kaayong unanimous decision batok ni African champion Svenathi Nontshinga sa ilang world light flyweight title eliminator niadtong Abril 25 didto sa Boardwalk Hotel and Casino sa Gqeberha, South Africa.

Si Araneta nagtangag og 19-2 win-loss record uban ang 15KOs. Inilog kaayo siya batok sa nagkagidlay nga si Garde, nga nagkupot lamang og 10-10-3 nga baraha ug naparotpa gyud sa katapusan niyang upat ka away.

Sa supporting main event nga gikatakda sud sa 10 ka hugna ubos sa super featherweight division, usa ka kulbahinam nga sangka ang gipaabot tali nilang Tomjune “War Dog” Mangubat (14-2-1, 11KOs) ug Allan Villanueva (11-1, 8KOs) nga pulos kusgan ug gamhanan og mga kinumo.

Mopakita sab og aksiyon sa maong pasundayag sila si Franco Serafica (6-1) batok ni John Kennan Villaflor (8-7-4) ug Benny Canete (3-0) batok ni Mark Jequinto (4-7-1).