18 ka barangay sa Cebu City wala nay kaso sa COVID-19

CEBU, Philippines — Niabot na ngadto sa 18 ka barangay sa Dakbayan sa Sugbo ang walay kaso sa COVID-19 sulod sa napulo ka adlaw kini base sa talaan sa Emergency Operation Center.

Base sa report sa EOC nga sa 80 ka barangay sa siyudad 62 ang aduna pay mga kaso sa COVID-19 samtang 18 ang walay kaso sulod sa napulo ka adlaw.

Si Konsehal Joel Garganera, pangulo sa EOC padayon nga niawhag sa katawhan nga dili gihapon mokompiyansa ug padayon nga mosunod sa health protocols ug social distancing.

Samtang sa Dakbayan sa Talisay nikunhod na usab ang kaso sa COVID-19 sa siyudad. Gikan sa kapin sa 200 ka kaso anaa na lang sa 120 ang aktibong kaso sa siyudad.

Sa laing bahin, niabot ngadto sa 80,126 ka doses sa bakuna batok sa COVID-19 ang na-administer sa Siyudad sa Naga.

Base sa post diha sa Facebook page sa kagamhanan sa siyudad nga 41,052 niini ang nakadawat na sa first dose samtang 39, 074 usab ang fully vaccinated na base sa Oktubre 1, 2021 nga datos sa siyudad.

Ang siyudad adunay gipahigayon nga online registration sa mga residente niini kinsa gustong magpabakuna.

Mamahimo nga makabisita sa  City of Naga Vaccination Operations Center Help Desks nga anaa mahimutang sa lobby sa City Hall  of Naga,  Vicente Mendiola Center for Health ug entrance sa  City of Naga Vaccination Center ang mga residente kalabot sa. ilang pagpabakuna

Samtang sa Dakbayan sa Mandaue hingpit na nga nakapangandam alang sa pagpamakuna batok sa COVID-19 alang sa mga menor de edad nga nagpangedaron gikan sa 12  ngadto sa 17-anyos kong ugaling aduna nay ipagawas nga guideline ang nasudong kagamhanan kalabot niini.

Nunot niini, ang lokal nga kagamhanan sa  Dakbayan  sa Lapu-Lapu lakip usab sa nipahigayon na sa pagpanglista sa mga menor de edad isip pagpangandam usab alang sa pagpamakuna na sa kabataan. Gabriel C. Bonjoc. Le Phyllis F. Antojado ug Romeo T. Limpangog/BDB (BANATNEWS)