‘Sir Chief’ miduso og COC pagka kongresista sa North District

CEBU, Philippines — Sikat nga artistang si Richard Yap nga naila sa iyang screen name nga “Sir Chief” niduso na og certificate of candidacy diha sa Comelec North District aron mokandidato pagusab pagka-kongresista.

Apan tungod kay toa pa kini sa kaulohan alang sa iyang taping sa bag-ong teleserye, ang iyang asawa nga si Melody ug duha nila ka mga anak maoy nirepresentar kaniya pagduso sa iyang COC.

Si Yap midagan isip independenteng kandidato. Kaniadto ubos siya sa landong partidong Kusug apan naparot.  Hinuon giingong mobalik si Yap dinhi sa Sugbu ini og mahuman ang iyang obligasyon didto sa kaulohan aron tutokan ang iyang pagkandidato.

Sa pikas bahin, ang mga sakop sa Barangay Kagawad sa Dakbayan sa Sugbo (Barkadas) niawhag sa tanang mga kandidato nga likayan ang pagpakatap sa mga fake news, ug black propaganda aron mamentaha sa ilang mga kaatbang. Si Barangay Banilad Kagawad Claudine Vercide miingon nga imbes mangdaot sa kaatbang mas maayong buhaton sa mga buot magpapili mao ang pagpresentar sa ilang mga planong pagtabang sa katawhan ug pagpalambo sa distrito.

Matud pa sa grupo kansang mga miyembro nga barangay kagawad sa nagkalain-laing barangay sa North District mas maayo sab nga tumanon ang mga gipangsaad sa mga nakadaog sa nakalabay nga eleksyon kay hangtud karon daghan sa mga natabangan nilang politiko ang wala na molingi kanila.

Ang grupo misuporta sa kandidatora ni Yap, mipasidaan bahin niini human nakadungog sila nga nga adunay mga tinguhang mopasaka og hinimo-himong kaso batok sa usa ka kandidato nga magpapili sa North District. Matud pa ni Vercide, nakadungog silang kwestyunon sa usab ka kandidato ang citizenship ni Yap. Apan giklaro sa grupo nga Pilipino si Yap ug nagdako kini sa Barangay Sambag 2 ug karon nagpuyo na kauban sa pamilya diha sa Barangay Kasambagan ug duna silay mga dokumentong makapamatuod niini.

Ang Barkadas nitug-an nga ilang gisuportahan si Yap tungod kay may dedikasyon kini motabang sa mga tawo bisan og dili kini public official.

Matud nila hilom ra sab kaayo si Yap nga nitabang sa mga barangay sa North District sa nanglabay nga mga buwan apan wala gyud kini niini gipang-post sa Facebook o social media kay di siya gustong hukman.

Gibutyag kadaghanan sakop sa Barkadas nga lahi si Yap sa uban mga politiko, kinsa daghan kaayong mga saad apan sa dihang nakadaug na wala na molingi sa mga tawong gipangsaaran.

Matud pa nga daghang programang gihimo si Yap nga sa hilom lang niya gihimo sama sa livelihood programs sa mga kababayen-an ug mga medical services ug pagpanghatag og wheelchairs ug sungkod sa mga senior citizens. IBM (BANATNEWS)