Probinsiya ug Cebu City nangandam sa La Niña
CEBU, Philippines — Ang Cebu Provincial Disaster Council magtigom kini alang sa pagpangandam sa nagsingabot nga La Niña.
Matud ni Wilson Ramos, information interim officer sa Provincial Disaster Risk Reduction and Management Office nga ang tigom gikatakda sa Oktubre 1, 2021 diin ang mga departamentong hingtungdan gipaabot nga motambong niini aron hisgotan ang pagpangandam sa matag lungsod ug siyudad sa probinsiya.
Apil nga hisgotan ang safety measures sa mga tourist destination human sa trahediya nga nahitabo diha sa Tinubdan Falls sa Lungsod sa Catmon.
Apan giklaro ni Ramos nga ang tigom dili tungod sa nahisgutang hitabo gumikan kay dugay na kini nga gi-schedule nga tigom sa council.
Matud ni Neil Sanchez, sa PDRRMO nga plano nila nga morekomendar ngadto sa LGUs nga bansayon tour guides kalabot sa mga angay buhaton kon adunay mga emergency o insidente nga mahtiabo diha sa mga tourist destinations ug aron usab mahan-ay ang safety protocol alang sa mga bisita.
Sa laing bahin, giawhag sa Cebu City Council ang City Disaster Risk Reduction and Management Office (CDRRMO) ug ang ubang konektado nga mga departamento nga susihon ang kondisyon sa mga heavy equipment ug ayohon dayon kon aduna kini mga deperensiya.
Tumong niini nga mahatagan og dakong pagpangandam kon ugaling adunay mga trahedya o kalamidad nga mahitabo ilabi na diha sa kabukiran nga kasagarang maapektohan kon adunay kusog nga ulan.
Si Konsehal Raul Alcoseba ang nangamahan sa resolusyon kabahin niini ug giaprobahan sa konseho sa Dakbayan sa Sugbo.
Ang ubang city hall departments nga lakip sa giawhag mao ang Department of Public Services, Department of Engineering and Public Works, ug Department of General Services. BDB (BANATNEWS)
- Latest