Bakuna sa iro og iring gihatag sa DVMF

CEBU, Philippines — Naghatag og libreng rabies vaccine ang Department of Veterinary Medicine and Fisheries (DVMF) Cebu City alang sa mga iro ug iring subay na sab sa annual celebration sa World’s Rabies Day, matag petsa 28 sa buwan sa Septiyembre.

Si Dr. Jessica Maribojoc sa DVMF miasoy nga nakapahimulos niini ang mga residente sa Dakbayan ug duna sila’y gisunod nga paagi aron masiguro nga natuman gihapon ang basic health protocol sanglit naa paman ang hulga sa COVID-19. Kini ang labing unang higayon nga gihimo sa DVMF ang drive thru rabies vaccination gumikan sa pandemya tungod kay gipaningkamutan nila nga matuman gihapon ang minimum health protocols.

Gihulagway ni Dr. Maribojoc, ang pagpabakuna sa mga binuhi sama sa iring ug iro kung mag-edad og tulo ka buwan pataas kabahin kini sa responsible pet ownership aron dili magka rabies. Alas 8 sa buntag kagahapon gisugdan sa DVMF ang ilang kalihukan ug natapos kini alas 5 sa hapon. Usa sa nipahimulos sa maong libreng rabies vaccine si Kimberly Barbadillo, residente sa Barangay Basak Pardo ug dunay 34 ka iro ug 10 na ka iring.

Ang mga iring ug iro ni Barbadillo mga rescued pets, niadtong 2015, feeding pa lang ang iyang gibuhat ug pag 2017, didto na siya nagsugod og rescue sa mga pets nga gilabay ug giabandonar.— MEL (BANATNEWS)