P8.6 milyones kantidad sa shabu nga nasakmit, 12 ka tawo sikop

CEBU, Philippines — Nikabat ngadto sa P8.6 milyones ang kantidad sa drugas nga nakasakmit ug 12 ka tawo ang nasikop atol sa upat ka managlahing buy bust operation sa kapolisan ug Philippine Drug Enforcement Agency-7 niadtong Sabado sa gabii.

Ang City Intelligence sa Lapu-Lapu City Police Office nipahigayon kini og buy bust operation diha sa karaang terminal sa Barangay Pajo diin nasikop nila si Christopher William Lucañas,33, usa ka high value individual, residente sa dalan C. Padilla, Dakbayan sa Sugbo.

Nasakmit sa kapolisan gikan sa suspetsado ang 1,050 gramos nga shabu nga gibana-banang nikantidad tanan ngadto sa P7.1 milyones.

Si Police Major Joey Bicoy, hepe sa LLCPO CIU nagkanayon nga si Lucañas konektado kini sa mga dakop nila kaniadto kalabot sa ilegal nga drugas.

Subay niini, ang PDEA-7 nipahigayon og operasyon pag-dismantle sa drug den diha sa Barangay Basak San Nicolas, Dakbayan sa Sugbo diin nasikop nila si Rodilo Cabillo, 41, nagmentinar sa drug den, mga nianha diha sa drug den nga sila si Renan Gabrillo, 35; Ramon Gabrillo; Nikki Rose Desina, 27; Gino Maxilla, 35; Dunhin Tabar, 32 ug Janyve Rama, 36.

Nasakmit atol sa maong operasyon ang 10 ka putos sa shabu nga nitimbang ngadto sa 12 gramos ug gibana-banang nikantidad ngadto sa P81,600.

Samtang ang kapolsain sa Labangon Police Sation nipahigayon og operasyon diha sa A. Lopez Street, Barangay Labangon, Dakbayan  sa Sugbo diin nasikop sa maong operasyon si Val Christopher Vargas Tanag, 18-anyos ug giingong nalakip sa regional data base isip HVI ug John Mark Arcilla Navarro, 18.

Nasakmit gikan sa mga suspetsado ang 155 gramos nga shabu nga nikantidad tanan ngadto sa P1,054,000.

Sa laing bahin, nasikop atol sa operasyon sa Regional Drug Enforcement Unit-7 nga gipangulohan ni Police Major Glenn Hife diha sa Barangay Kamputhaw, Dakbayan sa Sugbo sila si Gizese Alda Alabanza, 26 ug Caroline Cabañez Arda, 35, giingong usa ka freelance asset sa kapolisan. 

Nasakmit gikan kanila ang 52 gramos nga shabu nga gibana-banang nikantidad ngadto sa P353,600. BDB (BANATNEWS)