VaxCertph Booth gilusad sa Mandaue
CEBU, Philippines — Gilusad niadtong miaging adlaw ang vaccination certificate Booth o VaxCertph Booth nga nahimutang sa Mandaue City Cultural and Sports Complex sa Sitio Tribunal,Barangay Centro sa Dakbayan sa Mandaue.
Gimugna ang VaxCertph Booth aron paghatag og vaccination certificate alang niadtong nabakunahan na kontra COVID-19 aron paglikay sa pagpahimulos sa pipila ka tawo nga mohatag og fake nga vaccination cards.
Kining maong sistema adunay iyang kaugalingon nga security code nga dili makopya sa mga tigbuhat og fake nga vaccination certificate.Nasayran ang certificate maoy gikinahanglan sa mga Oversease Filipino Workers (OFW) ug ingon man sa international travellers nga niining higayona mahimong mo-walk-in lang sa ilang pagkuha o moparehistro daan sa online pinaagi sa https://vaxcert.doh.gov.ph. Makuha ang vaccination certificate sulod lang sa pipila ka minutos nga pagpaabot.
Ang gikinahanglan nga dad-on sa pagkuha og vaccination certificate mao ang vaccination card o mahimo usab nga vaccination card nga adunay QR code.
Samtang sa laing bahin gipangunayan ni Mayor Elanito Peña sa lungsod sa Minglanilla ang paghangyo sa iyang mga konstitwenti nga magpabakuna na batok COVID-19.
Sa pagkakaron, gibana-bana nga mokabat na sa 92 mil ka tawo ang ilang nabakunahan.
Gitug-an sa mayor nga nakasugat sila og kalisdanan sa pag agni sa mga tawo nga magpabakuna tungod sa nadunggan ug nabasahan niini nga dili maayo nga epekto sa bakuna.
“Ako mismo niadto ko sa matag barangay aron pag awhag sa mga tawo nga magpabakuna na,” asoy pa ni Peña. MEL (BANATNEWS)
- Latest