Kasal na-scam

CEBU, Philippines — Ang wedding coordinator nga giingong nangilad sa usa ka magtiayong iyang kliyente gidali pagdala sa tambalanan human giingong nisuway sa paghikog pinaagi sa pag-hiwa sa iyang pulso.

Gikumpirma sa Consolacion Police nga alas-11 sa buntag sa Huwebes, Septiyembre 23,2021, nakadawat sila tawag sa mga opisyal sa Barangay sa Casili, Consolacion bahin sa usab ka lalaking naglaslas sa iyang pulso sa sulod sa iyang giabangang kuwarto.

Apan sa ilang pagsusi sa tambalanan wala didto ang naglaslas nga giingong usa ka wedding planner kay giingong nipirma kini og waiver nga nagdumili siya pagpa-admit.

Ang Banat News nipugong una sa pangalan sa maong wedding planner samtang wala pay pormal nga reklamong gipasaka batok kaniya.

Usa sa silingan niini nga nakahinabi sa usa ka lokal nga sibyaanan ang miingon nga napalgan nila kini sa lawak nga naglaslas na sa pulso.

Nahitabo kini pipila ka gutlo human nga dunay mga sakop sa media nga nangita sa maong wedding planner. Diha nalang nila nahibaw-an nga nag-trending na diay kini sa social media tungod sa alegasyong dunay kliyente niining gikasal sa lungsod sa Minglanilla ang na-scam kay wala ma-book ang reception sa kasal.

Sa mga nanggawas nga post sa social media, makita ang bride nga niyaka nga naghilak samtang nagsuot pa sa iyang wedding gown samtang kini gialam-alaman.

Giingong kuha kining maong video sa atubangan mismo sa wedding reception venue nga wala ma-book sa maong wedding planner. Ang Consolacion Police Station nagkanayon nga wala pa sila nakadawat bisan unsang reklamo batok sa maong wedding planner.

Apan sa usa ka Facebook post sa usa ka Tonskie Elsisura, usa ka photographer sa nahisgotang kasal miingon nga nitungha pa ang maong wedding planner nga mao sab ang mikuha sa ilang serbisyo alang sa maong event.

Sumala pa nga ang bag-ong gikasal nakabayad na sa tanang bayrunon sa wedding reception. Apan nianang nahuman na ang kasal ug tingpaniudto na, nilakaw ang maong wedding planner ug wala na nila makontak pa.

Apan pagabot sa mga bisita ug sa bag-ong gikasal sa venue sa reception diha sa Labangon sa Cebu City, wala diay ma-book ang maong event hinungdan nga nakahilak ang bride ug nakapasagmuyo sa pamilya niini.

"Oh pag-abot namo didto close jud ang venue! Walay handa, wala tanan! According sa management wala daw na-book na event that day.. pati kami mga suppliers scam sad wala mabayri," dugang niya sa iyang post sa Facebook. —IBM (BANATNEWS)