Vaccination card lain-lain og dagway

CEBU, Philippines — Kapulisan miangkon nga lisod para kanila pagdeterminar sa mga vaccine cards, kung kini peke ba o dili tungod kay dili parepareo ang gipang-isyu nga vaccination cards matag Local Government Unit.

Matud pa ni Police Lieutenant Colonel Wilbert Parilla, Deputy Director for Operation sa Cebu City Police Office, nagtagbo sila sa mga kadagkuan sa Emergency Operations Center, Cebu Chamber of Commerce and Industry, Criminal Investigation Detection Group aron tukion ang plano sa paghatag sa mga magpapatigayon ug incentives sa bakunado na.

Apan naproblema sila tungod kay unsaon man nila pagsigurong dili peke ang vaccination card nga gipresentar sa ilang kustomer?

Gitug-an ni Parilla, adunay mga bakuna card ang dali ra nga ma peke tungod kay wala may security features samtang ang uban duna.

Dili palang dugay aduna na silay nadakpan ug napasakaan og kaso tungod sa paghimo og vaccine cards sa kantidad nga P500  diha sa Sanciangko  Street, Cebu City. Si Parilla, subling nipahimangno sa katawhan nga likayan gayud ang pagbaton ug pagpayuhot og vaccine cards.

Ang mga magpapatigayon gustong tabangan ang gobiyerno aron modaghan ang maengganyo sa pagpabakuna batok Covid-19 pinaagi sa paghatag og insentibo sa mga bakunado nilang kustomer.

Tumong sab niini aron nga makab-ot og dali ang target nga herd immunity aron sab mobalik og kalagsik ang ekonomiya nga naapektohan tungod sa Covid-19 pandemic.

Si Police Colonel Ireneo Dalogdog, hepe sa Criminal Investigation and Detection Group (CIDG)-7 miingon nga wala pa sila nakadawat og pormal nga kamanduan labot sa hangyo sa siyudad sa Sugbu pagmonitor aning nanghimo og fake vaccination cards.

Ang vaccination cards sab maoy basehan sa siyudad nga ang tawong nisulod dinhi bakunado ba gyud apan ang problema unsaon man nila pagsiurong dili peke ang bakunang gipresentar kanila.

Giangkon hinoon niiii nga lisod ilhon ang peke ug dili kay managlahi ang dagway sa mga vaccination card sa matag Local Government Unit itandi sa dakbayan sa Sugbo nga dunay QR code ug daling masayran kun kini tinuod o dili.— IBM (BANATNEWS)