Mga kawani sa Lapu-Lapu makadawat og quincentennial bonus
CEBU, Philippines — Gipaniguro ni Mayor Junard Ahong Chan nga makadawat og quincentennial bonus ang mga kawani sa City Hall sa 4th quarter niining tuiga.
Matud pa niya nga nalangan lang ang disbursement sa quincentennial bonus tungod kay giuna ang paghatag og gahin nga salapi alang sa coronavirus disease response.
Hinuon iyang gitataw nga niining naghinapos na ang tuig sa 2021 maoy himoon sa kagamhanan ang pagpangita og extra fund nga maoy igahin alang sa maong katuyoan.
“We are not against sa quincentennial bonus sa atong mga workers because they are also deserving, because some of them are frontliners nga nagtrabaho gyod.” ni Mayor Chan pa.
Si Mayor Chan miingon nga adunay available nga pundong salapi ang siyudad gikan sa surplus nga ilang magamit alang sa quincentennial bonus sa mga kawani.
Una niini gisugyot ni Mayor Chan ang paghatag og quincentennial bonus sa mga kawani sa city hall nga mokabat sa P25, 000.
Apan sa pagkakaron posible kini nga mausab ug mag agad sa pundo nga ilang mahipos.
“I think it will be adjusted, depende sa availability sa funds. For me, basta naa la’y available funds, mao lang na’y bahinon,” nagkanayon si Mayor Chan. —MEL (BANATNEWS)
- Latest