MCPO nagpabiling full alert status nunot sa taho nga terror attack
CEBU, Philippines — Nagpabilin karon sa full alert status ang kapolisan sa Mandaue City Police Office (MCPO) nunot usab sa mga taho nga ang Pilipinas posibleng target sa pagpangatake sa mga terorista sa Southeast Asia.
Si Police Lieutenant Colonel Mercy Villaro, tigpamaba sa MCPO nagkanayon nga gipaubos karon sila sa heightened alert status tungod sa maong taho.
Matud ni Villaro nga ilang gipahugtan usab karon sa pagbantay ang mga establisamento sa dakbayan ilabi na nga anaa na karon sa “ber month”.
Gisiguro usab sa kapolisan nga matuman ang minimum health protocols ug ingon man ang pagpugong sa posibleng krimen nga mahitabo diin gilaoman nga niining mga panahona modagsang usab ang daghang mga tawo diha sa mga establisamento.
Sayo pa, ang embahada sa Japan didto sa Manila nikompirma nga ang ilang gobiyerno nakadawat og impormasyon sa posibleng terror attack sa Southeast Asia lakip na niini ang Pilipinas.
Ug sa maong impormasyon, niluwat sila og warning alert sa Japanese people nga nagpuyo sa ubang mga lugar sa mga nasud sa Southeast Asia nga magmabinantayon.
Sa maong taho giingong ang mga nasud nga posibleng malakip sa pagpangatake gilangkuban sa Pilipinas, Singapore, Malaysia, Thailand, Indonesia ug Myanmar. BDB (BANATNEWS)
- Latest