Orcollo, Chua pabiling way pilde sa us Open 9-Ball Championship

Apan Kiamco, laing 3 ka Pinoy nangatagak

CEBU, Philippines — Chua nagpabiling way pilde apan upat sa ilang mga kababayan apil na ang Sugbuanong si Warren Kiamco ang nangatagak sa 2021 US Open 9-Ball Championship didto sa Harrah’s Resort sa Atlantic City, New Jersey.

Ang taga-Surigao nga si Orcollo milampornas sa Amerikanong si Corey Deuel, 11-1, ug Alex Kazakis sa Greece, 11-3, samtang si Chua, lumad gikan sa Bacolod City, 4-0 na sab human gipayaka sila si Christopher Lawson, 11-5, ug Pijus Labutis sa Lithuania, 11-6.

Si Orcollo makigharong sunod ni Oliver Szolnoki sa Hungary samtang si Chua makigtige ni Mieszko Fortunski sa Poland alang sa luna sa Final 16.

Sa iyang bahin, si Carlo Biado mikastigo ni kanhi world champion Mika Immonen sa Finland, 11-1, apan gibuntog ni David Alcaide Bermudez sa Spain, 5-11.Puyde pa hinoon siya nga mo-abante sa sunod nga bahin sa $300,000 nga torneyo kon iyang pildihon si Daniel Schneider sa Switzerland.

Mao sab ang dalan nga agian sa laing mga pambato sa Pilipinas nga sila si Roland Garcia ug Jeffrey de Luna.

Si Garcia nahagba sa mga kamot sa Hapon nga si Naoyuki Oi, 8-11, samtang si De Luna gipukan ni Rodrigo Geronimo, 10-11.

Apan buhi pa ang ilang kampanya alang sa $50,000 (P2.5 million) nga ganti.

Kini human si Garcia namawi pinaagi sa pagposte og sagunson nga daog batok nilang Waleed Majid, 11-8, ug Mateusz Sniegocki sa Poland, 11-5, ug si De Luna mipakaging nilang David Daya, 11-3, ug Fil-Canadian Alex Pagulayan, 11-0.

Sunod nga sangkaon ni Garcia si Niels Feijen sa Netherlands, samtang si De Luna mohamag ni Ralf Soquet sa Germany.

Lahi hinoon ang nadangatan ni Kiamco nga hingpit nang nanamilit sa unom ka adlaw nga aksiyon uban nilang Jeffrey Ignacio, Roberto Gomez, ug James Aranas.

Human gipilde in Francisco Sanchez Ruiz sa Spain, 6-11, si Kiamco nakabawi pinaagi sa pagbihag ni Joseph Korsiak, 11-2, apan gipalagpot ra sab dayon siya ni Skylar Woodward, 9-11.

Si Ignacio mipatigbabaw ni Raymond Linares, 11-8, human gipukan ni Chang-Jung Lin sa Chinese-Taipei, 8-11, apan gitagak siya ni John Morra, sa Canada 2-11.

Si Gomez mibabay na sab human nasagunsonan og pilde nilang Russian Fedor Gorst, 6-11, ug Taiwanese Wu Kin Lin, 10-11 ug ingon man si Aranas, nga gipabakwit nilang Pijus Labutis sa Lithuania (9-11) ug Jonas Souto Comino sa Spain (10-11).