PCAP 3rd conference: Trojans, Naki Warriors gisubha’g daog
CEBU, Philippines — Giablihan sa Toledo City Trojans ug Lapu-Lapu City Naki Warriors ang tagsa-tagsa nila ka kampanya pinaagi sa usa ka masipang buto sa Professional Chess Association of the Philippines (PCAP) Premier Cup niadtong Miyerkules sa gabii.
Ang Trojans mi-arangkada dayon sa ikatulo ug panapos nga komperensiya sa labing unang propesyonal nga liga sa chess sa nasud human gipakaging ang Cebu City Machers, 12.5-8.5.
Sila si International Master Rico Mascarinas, Rommel Ganzon, Richard Natividad, ug Glicerio Pardillo Jr. mituboy sa Trojans ngadto sa 4-5-2.5 nga pagbuntog sa Machers sa blitz. Sila gihapon maoy responsable sa 8-6 nga daog sa Trojans sa rapid event.
Ubos sa pagtimon ni playing co-team owner Atty. Jeah Jean Gacang, team manager Felix Poloyapoy Jr. ug team captain Bonn Rainauld Tibod, ang Trojans gilangkoban sab nilang Ronald Ganzon, Christopher Tubalado, Redentor Nailon, Rogelio Enriquez Jr., ug Jinky Catulay.
Sa laing bahin, ang Naki Warriors nga gipangulohan nilang National Masters Elwin Retanal ug Edsel Montoya ug Woman IM Bernadette Galas misungag sa Mindoro Tamaraws, 13-8.
Nakakuha og igong suporta gikan nilang Anthony Makinano, Brylle Arellano, ug Allan Pason, ang Naki Warriors mibugha sa aTamaraws sa blitz, 6-1, sa wala pa sila magtabla sa rapid, 7-7.
Wa hinooy suwerti ang laing Cebu team nga Cordova Dutchess Dagami Warriors nga gipakaging sa Surigao Fianchetto Checkmates via a 9-12 decision.
- Latest
