Daghang lugar sa Cebu City gibahaan

CEBU, Philippines — Dul-an sa 14 ka mga lugar sa Dakbayan sa Sugbo ang nakasinati ug kahuot sa traffic udto sa adlaw nga Huwebes tungod sa pagbaha human sa pagbunok sa kusog kaayo nga uwan.

Ang mga gibahaang mga lugar mao ang D. Jakosalem Street, Bonifacio Street, Carreta, Lorega- San Miguel, T. Padilla St, Legaspi-Manalili, Nasipit-Talamban, dalan Colon, N. Bacalso Avenue, Osmeña Blvd-P.Del Rosario Street, RR Landon-Junquera, MJ Cuenco near CTU, Leo Kilat-P. Del Rosario, Echavez St-Sikatuna, ug R. Duterte Street.

Ang Cebu City Transportation Office niawhag sa mga motorista biyahidor atol sa pagbunok sa ulan nga maglikay sila sa mga dalan nga gibaha aron makalikay sila sa traffic. Gidasig usab sa CCTO ang mga biyahedor nga maghinay sa ilang pagpadagan sa kadalanan aron likay sa disgrasya. Si Feva Genobiagon-Padica sa Sitio Huyong-Huyong Alaska Mambaling nipakita usab sa grabeng baha.

Sumala pa ni Padica, unang higayon karon tuiga nga dako gayud ang tubig Baha nga nilapas sa hagdanan nga gawas sa ilang balay. Ang tubig baha sa ilang dapit hapit moabot taga hawak. Gitug-an pa ni Padica, nilanat pa ug pipila ka oras una nihubas ang tubig Baha, nga nakaapektar usab sa pipila nila ka mga butang.

Ang mga sakop sa Baragany Capitol Site ingon man ang Cebu City Disaster Risk Reduction Management Office(CCDRRMO) nagtinabangay sa pagkuha sa mga yuta nga nakababag sa dalan tungod sa maong hitabo. —Decemay P. Padilla/IBM (BANATNEWS)