Mga barangay pahatagon og report bahin sa pagpatuman sa health protocol

CEBU, Philippines — Tinguha sa kapolisan sa Lungsod sa Minglanilla nga mosumitir og report ang mga barangay kabahin sa ilang nahimo pagpatuman sa health ug safety protocol.

Kini human namatikdan nga dunay mga barangay nga pakyas sa pagpatuman sa mga lagda aron mapugngan ang pagkatap sa COVID-19.

Nasayran nga mikabat sa 15 ka volleyball net ug walo ka basketball ring ang nakumpiska sa kapolisan sa lungsod sa Minglanilla sa dihang gipaubos sila sa Modified Enhanced Community Quarantine (MECQ) karong tuiga.

Si Police Senior Master Sergeant Christopher Cesa, Police Community Relation (PCR) niingon nga gibawal pa gyud ang maong mga duwa aron malikayan ang panagtapok sa mga tawo nga maoy hinungdan sa pagtinakdanay sa COVID-19.

Gani ning bag-o, usa ka volleyball net ang nakumpiska sa Barangay Tungkop.

Si Police Major William Homoc, hepe sa kapolisan una nang nihangyo ngadto sa Department of Interior and Local Government (DILG) nga kung mahimo makasumiter og report ang matag barangay kung unsa ang ilang nahimo sa pakigbatok sa makamatay nga virus.

Gibuhat kini ni Homoc atol sa tigum sa Municipal Peace and Order Council uban si mayor Elanito Peña.

Ang kapulisan naningkamot sa pagpukan sa makalilisang nga sakit pinaagi sa pagbutang og Quarantine Community Precinct, pagrekorida, curfew ug uban pa inubanan sa lokal nga kagamhanan ug sa Minglanilla Traffic Commission (MITCOM).

Apan sa mga sudlonon nga lugar sa matag barangay didto makita ang mga tawo nga daw sama sa walay nahitabo ug wa motuman sa mga lagda sa gobyerno.

Ilang gipasabot nga unta ang mga opisyales sa barangay mohimo sa ilang bahin aron di na magbalik-balik sa pagsupak sa lagda sa IATF.

Wa pa hinuon gibutyag sa DILG kun unsa nga mga barangay ang nitrabaho ug ang mga barangay nga way nahimo sa pagtuman sa ilang gipanumpaan nga katungdanan. —MEL (BANATNEWS)