Ayaw itago kun dunay gipamati sa lawas

CEBU, Philippines — Nanawagan ang kagamhanan sa Lungsod sa Samboan ngadto sa ilang mga konsituwente nga dili unta motago ug modangop gyud sa Rural Health Unit (RHU) kun pananglitan duna sila’y gipamati nga ubo , sip-on ug hilanat.

Sa advisory sa maong Lungsod nga gi-post sa ilang social media account, gipadayag niini nga labing maayo nga dili gyud itago ang gipamati sa lawas aron mahatagan dayon og solusyong medikal ug dili na mosamot kadako ang problema.

Ang nahisgotang mga sakit kay sintomas sa COVID19. Gipasalig nila nga confidential gyud ang pag-atiman sa mga pasyente.

“Busa, mentras sayo pa, tawag daan sa RHU aron sila ma-monitor ug ma-swab! Ayaw kahadlok nga ma-quarantine kay ang pag-quarantine timaan kana nga mamonitor ang atong kahimtang ug arun dili na kita makatakod pa sa uban ilabina sa imung kapamilya. Be responsible!” tipik sa unod sa maong advisory.  Sa laing bahin , padayong gikampanya sa maong lungsod ang pagpabakuna.

Nasayran nga dako kaayo og matabang ang pagpabakuna aron malikayan ang  severe nga kahimtang sa lawas kun pananglitan mataptan sa COVID19 ang tawong bakunado.— IBM (BANATNEWS)