Mga barangay sa Norte gibahaan

CEBU, Philippines — Bagyong Jolina nakaapektar amihanang bahin sa Sugbu  ilabi na sa mga coastal towns niini kagahapong adlawa, pipila ka mga lugar ang nagdili sa pagpabiyahe sa mga sakyanan sa dagat tungod sa kusog nga hangin nga nagmugna og dagkong bawo

Sa Lungsod sa Daanbantayan lima ka mananagat ang gisalbar sa mga sakop sa Philippine Coast Guard (PCG) kagahapong adlawa tungod sa bagyong Jolina.

Dunay usa ka mananagat nga gikatahong na missing kay wala na makauli sukad sa iyang panagat niadtong Septembre 6 sa gabii hangtod kagahapon sa buntag.

Matud ni Victor D’Osep Tancawan ang hepe sa Daanbantayan DRRMO, pasado alas 11 buntag kagahapong nakauli na sa ilang balay sa barangay Malbago si Marcus Dejito Sr. 42. Nasayran nga nabalian kini og katig sa iyang bangka didto sa lawod.

Samtang duha usab ka mananagat nga gi rescue sa Coastguard didto kadagatan sa barangay Maya human gianod ang ilang pumpboat gikan sa barangay Tapilon padulong sa barangay Maya.

Giila sa DRRMO  sa Daanbantayan ang mga na rescue nga mananagat nga sila Jessie Naraja, 41, ug Pedro Lagahit,  55.

Tungod sa bagyong Jolina, pipila ka lungsod ug syudad sa Northern Cebu ang nabahaan.  Moabot sa halos usa ka metro ang gilawmon sa tuig baha ang nasinati sa pipila ka areas sa Barangay Poblacion sa Borbon.

Matud ni Engr. Rodrigo Tesson, ang hepe sa Local Disaster Risk Reduction and Management Office (LDRRMO) sa Borbon nakasinati sila og pag-ulan niadtong niaging gabii ug nisaka ang tubig mga alas- 3 sa kaadlawon.

“Naa sa may Poblacion, nihawa sa sila sa ilang mga balay niadto sa taas nga bahin sa yuta pero ilang mga butang nabahaan gyud” matod ni Tecson.

Alas 5 sa buntag na nihinay ang ulan. Walay natala nga na missing, naangol o nakalas sa maong hitabo apan dunay mga punoan sa kahoy ug mga pananom ang nangatumba sa karsada.

Sa syudad sa Bogo, unom ka barangay sab ang nabahaan  sama sa Barangay Bungtod, La Purisima Concepcion, Polambato, Taytayan ug Don Pedro kon diin ang highway niini gilunop kagahapon sa buntag hinungdan nga na stranded ang pipila ka motor.

Matud ni Cornelio Saberon ang resource and planning officer sa DRRMO Bogo nga wala hinuoy nasakitan sa hitabo.

Samtang upat ka indibidwal ug duha ka rolling cargoes ang na stranded didto sa pantalan sa Pulambato.  Adunay usab natala nga sunog sa duha ka commercial establishments sa barangay Santo Niño ug barangay Dapit.

Sa San Remegio, 68 usab ka mga indibidwal ang na stranded sa Hagnaya Port padulong unta sa isla Bantayan tungod sa bagyo.

Sa Tabuelan, 14 ka balay ang gibahaan sa barangay Bongon. Sumala sa PDRRMO nga kadiyot ra usab ang pagtaas sa tubig.

Base sa alas-11 sa buntag nga weather bulletin sa PAG-ASA, naapil ang Cebu City, Mandaue sa mga lungsod ug siyudad sa Northern Cebu (Daanbantayan, Medellin, Santa Fe, Bantayan Islands, City of Bogo, San Remigio, Tabogon, Borbon, Tabuelan, Sogod, Tuburan, Catmon, Carmen, Danao City, Asturias, Compostela, Camotes Islands, Liloan, Consolacion, Balamban)  sa tropical cyclone wind signal number 1 tungod sa bagyong Jolina. Kagahapon sa alas-4 kaadlawon, ang Camotes Coastguard Station temporaryong misuspenso sa biyahe sa tanang sakyanan sa dagat tungod gihapon sa bagyong Jolina apan pagka-alas 5 kagahapon sa hapon gilibkas kini.

Tungod sa sa bagyo, gimando ni Talisay City Mayor Gerald Anthony “Samsam” Gullas nga dili tugotan ang mga bikers nga mosaka sa mga bukirang bahin sa dakbayan aron way maaksidente.

Si Engr. Al Quiblat, Chief Philippine Atmospheric Geophysical and Astronomical Services Administration nga nahinabi sa Banat News miingon nga karong adlawa magpabiling madagumong kalangitan sa Sugbu ug dunay katag ngadto sa hinay-kasarangan ug mga daklit nga pag-ulan ang masinati.

Sumala pa ni Quiblat, Huwebes-hangtod sa Sabado maayo na ang panahon apan adunay panagsang madag-omon inuban sa pat-ak pat-ak nga ulan ug adunay kahigayonan nga panognog ug kilat sa pipila ka lugar.— Gabriel Bonjoc, Rowena D. Capistrano/IBM (BANATNEWS)