Walk-in sa vaccination sites gitugot

CEBU, Philippines — Pipila ka mga lungsod ug syudad sa lalawigan sa Sugbo ang nitugot og walk-in sa ilang vaccination sites aron mas modaghan pa ang mga magpabakuna batok Covid-19. Apil sa local government units (LGUs) nga modawat og walk-ins ang Consolacion, Minglanilla, Carcar ug Danao city.

Sa Consolacion si Mayor Joannes Alegado nagkanayon nga nakabantay sila nga nikubos ang gidaghanon sa mga moadto sa ilang vaccination site.

“Naka-notice mi nga more or less naa naman mi schedules nga vaccinees pero ubay ubay ani nila dili man motunga. I don’t know for what reason,  so mao na we see that there’s a decrease on the number of jabs per day for the past days, mao na ng ani encourage na lang mi og walk-ins,” matud ni Alegado.

Matud ni Alegado usa sa nakita nila nga rason, mamili og brand sa bakuna ang mga tawo, samtang ang uban lisod ang schedule tungod kay ang uban adunay trabaho. Kun kaniadto moabot sa 1, 800 ngadto sa 2, 000 pataas ang magpabakuna, karon mas niubos pa kini. Target nila nga mabakunahan ang 102, 000 nga populasyon sa lungsod aron makab-ot ang herd immunity.

Sa laing bahin, ang 43 anyos nga drayber sa traysikol nga gidakop tungod kay nag-overloading niadtong milabay’ng semana nga gipaubos sa swab test kay sa dihang gidala kini sa buhatan sa CTODA mireklamo kining naglain ang lawas, migawas nga positibo diay sa Covid-19.

Si Jonathan Tumulak, traffic czar sa siyudad nagkanayon nga giseminar ang 43 anyos nga lalaki human sa iyang nahimo nga kalapasan batok Covid-19. Matud pa nagsige kini og hutoy og ubo hinungdan nga ilang gi-swab.

Usa sa problema karon, dili na nila ma-trace ang mga pasaherong nakasakay  sa maong drayber, apan ang mga traffic enforcers nga nakadakop niya gi-isolate na. Samtang sa Lapu-Lapu City, negatibo ang resulta sa swab test sa walo ka mga konsehal nga nitambong sa regular session niadtong Agosto 26, 2021 ug nakauban ang usa ka sakop sa media nga positibo sa maong sakit.

Si Konsehal  Rico Amores mikumpirmar nga  usa siya sa walo,  ug siya maoy presiding officer niadtong maong sesyon . Mapasalamaton siya nga  negatibo silang tanan. —Gabriel Bonjoc, Romeo T. Limpangog/IBM (BANATNEWS)