Malapason sa health protocols ug curfew nagkagamay—CCPO

CEBU, Philippines — Mga malapason sa Health Protocols ug Oplan Puyo sa Cebu City nagkagamay nalang sumala pa ni Lieutenant Colonel Wilbert Parilla, Deputy Director for Operations nga nahinabi sa mga tigbalita.

Matud pa niya nabantayan nila nga sa nanglabay nga mga adlaw nagkagamay nalang ang malapason nila nangadakpan.

Nagtuo siya nga nipatuo na sa hangyo sa gobiyerno nga kooperasyon sa tanan ang gikinahanglan aron masanta ang pagkatap sa Covid-19.

Kadaghanan sa mga nadakpan nakalapas gihapon curfew ug lakip ug wala magsul-ob og facemask.

Giawhag ni Parilla ang tanan nga mosunod sa mga balaod aron sa umaabot nga kapaskohan nindot ug mabulokon unya kining maselebrar.

Samtang sa Talisay City, miabot sa 300 ka tawo ang nangadakpan gumikan sa kalapasan sa curfew ning bulan sa Agosto sumala pa ni Police Lt. Roberto Barnido sa Talisay City Police Station.

Matud niya ang Brgy. Tangke maoy pinakadaghan og nadakpang malapason. Gani niadto lang adlaw nga Domingo 65 ka tawo ang ilang gidakop tungod sa paglapas sa curfew. Samtang 1,276 sab ang kinatibuk-an nga nadakpan tungod sa kalapasan sa health protocols.

Si Barnido miingon nga bisag General Community Quarantine ang siyudad karon padayon ang ilang operasyon batok sa mga malapason.

Sa pagkakaron, ang siyudad dunay 105 ka panimalay nga gipaubos sa granular lockdown tungod dunay usa o pipila ka mga kabanay nagpositibo sa makamatay nga virus.— IBM (BANATNEWS)