Konseho sa Dakbayan sa Sugbo nihangyo sa kalihim sa DPWH

CEBU, Philippines — Nihangyo ang Konseho sa Siyudad sa Sugbo ngadto sa kalihim sa Department of Public Works and Highways Mark Villar nga i-fast track ang tinguha nga mag-umol og 200-bed capacity modular hospital  isip usa sa maghatag og alternatibong kasulbaran sa pagkapuno na kasagaran sa mga tambalanan sa Siyudad sa Sugbo.

Nasayran nga ang luna sa siyudad diha doul sa NOAH complex sa South Road Properties maoy tukoran sa giplano nga modular hospital.

Si Konsehal Jerry Guardo ang nangamahan maong resolusyon ug giaprobahan dayon kini sa konseho sa siyudad.

Matud ni Guardo nga haom kaayo ang maong lugar sanglit dili kini residential area.

Sa pag-follow up ni Guardo ngadto kang DPWH-7 Director Edgar Tabacon nahibaw niya nga hamugaway ug dako ang mga lawak sa maong modular hospital ug adunay tukmang ventilation system.

Ang maong proyekto kabahin sa emergency response program sa DPWH.

Nasayran nga nagkatukod na og modular hospitals ang DPWH didto sa National Capital Region (NCR) human nangapuno usab ang mga pampubliko ug pribadong tambalanan sa maong dapit.

Sa laing bahin, gisusi ni Mayor Jonas Cortes ang kanhi DGS building nga giugmad isip extension sa Mandaue City Hospital nga iyang giingon nga mahimo kining masudlan og 70 ka mga pasyente sa COVID-19.                             

Ang maong pasilidad kompletohon kini sa mga kahimanan nga gikinahanglan nga naglakip sa hospital beds, airconditioning system, wifi internet connection ug uban pa.                                    

Adunay mga doktor ug nurse nga idestino sa maong pasilidad nga maoy moatiman sa masulod unya nga mga pasiyente niini. BDB (BANATNEWS)