Nagpailang nbi, gipangita sa NBI

CEBU, Philippines — Gimando sa pangulo sa National Bureau of Investigation Central Visayas Office ang pagpangita sa biker nga nagpailang ilang sakop ug nanukmag og delivery boy sa panaderiya nga nag-viral sa social media human nakuhaan og video ang iyang gibuhat.

Ang delivery boy nga iyang gidagmalan mao si Marvin Lobitaña midangop na sa maong buhatan aron moreklamo human sa pag-awhag sa direktor.

Si Atty. Renan Oliva, regional director sa NBI-CVRO miingon nga dili nila sakop ang maong biker.

Sa mikatap nga viral videos adunay usa ka lalaking nagmaneho og traysikol nga pangkarga og pan ang gisukmag sa usa ka lalaki nga nagbiseklita.

Ang maong biker adunay kaubang lalaki ug gituohang ang duha ka babayeng nag-bike sab nga nagsunod kanila ilaha sab mga kauban.

Giingong nahitabo kini alas-8 sa buntag niadtong Domingo diha sa eskina sa Hernan Cortes ug A. S Fortuna Streets sa Dakbayan sa Mandaue.

Ang maong lalaki nga nagpaila nga NBI nasuko tungod matud pa kay mi-overtake-an kanila ang delivery boy.

Makita sa video nga human og sukmag ug tampalong mo-aksyon og kupot sa hawak ang biker kinsa wala gyud mosukol o managang sa pagpangdagmal kaniya.

Samtang lain-laing anggulo sa videos makita nga walay gibuhat ang mga kaubang mga babaye sa biker apan ang kaubang lalaking biker sab miapil sab sa pagdapog sa biktima.

Si Oliva pagkakita sa video mipatawag sa tanan niyang mga sakop kun nakaila sa maong biker ug mga kaubanan niini, apan wala kanilay nakaila niini.

Sumala pa niya dili siya motugot nga duna siyay sakop nga moabusar ug mimando nga pangitaon ang maong grupo aron pasakaan og kaso.

Nagtuo si Oliva nga pekeng NBI agent ang maong biker ug gusto niyang pasakaan kini og mga kasong usurpation of authority.

Nagduda sab si Oliva nga nalambigit sab ang maong biker sa uban pang krimen sama sa extortion ug illegal drugs.— IBM (BANATNEWS)