Enforcer gisuspenso, gikalalis nga rider gipasakaan og kaso

CEBU, Philippines — Gisuspenso og 15 ka adlaw nga way madawat nga sweldo sugod karong adlawa ang traffic enforcer nga babaye nga gikalalis sa usa ka food delivery driver diha sa Lungsod sa Consolacion.

Samtang gipasakaan usab og kaso nga disobedience of a person in authority ang natanggong nga delivery driver nga si Marelino Merca Sabucido 23 anyos nga molopyo sa Oriental Poblacion sa Consolacion.

Ang maong panaglalis nakuhaan og video nga nag-viral sa social media diin makita nga gihapak sa enforcer si Sabucido og gihagit kini ug sukmagay.

Suma pa ni Consolacion Mayor Joannes "Joyjoy" Alegado nga manubag usab sa iyang salaud ang enforcer nga si Maricris Modena Vallejos 40 anyos ug siya gipamulta og P500 tungod sa wa pagsul-ob og facemask.

Si Vallejos, sakop sa Consolacion Traffic Enforcement and Special Service (CTESS) ug siya ipaubos sa training ug refresher course.

Suma ni  Police Corporal Cresenciano Saladaga sa Consolacion Police Station nga samtang nagpalabang sa mga tawo si Vallejos kalit nga mipadagan sa iyang motorsiklo si Sabucid ug giingong wa manumbaling sa gimando sa enforcer nga pagpahunong.

Nagdumili usab si Sabucido sa paghatag sa iyang drivers` license kinsa mialigar nga gihapak kini sa traffic enforcer.

Samtang sa laing bahin gipahimangnoan sa Cebu City Transportation Office ang mga PUJ Drivers nga kanunay nga magdala sa ilang sa ID human nasuta nga daghan sa mga driver ang walay CCTO ID.

Suma sa tigpamaba ug deputy head for operations sa CCTO nga si Paul Gotiong nga nasakpan usab nila ang ubang mga unit nga wala nipatuman sa social distancing ug nag-overloading. —Rowena D. Capistrano/Sanden Anadia/MEL (BANATNEWS)