Kapolisan padayong nagbantay sa mga violators

CEBU, Philippines — Dul-an sa 300 ka mga violators ang nadakpan sulod sa duha ka adlaw nga operation samtang gipaubos ang Siyudad sa Sugbo sa Modified Enhanced Community Quarantine MECQ.

Suma pa ni Police Lieutenant Colonel Wilbert Parilla, sa Agosto 1 nakadakop sila ug 119 nga hamtong ug adunay 6 ang minor, diin 108 niini ang kalapasan sa curfew ug 19 wala nag facemask.

Dugang pa ni Parilla, 128 usab ang natala sa Agosto 2, 2021 ug 17 niini mga minor de edad, diin curfew ug wa mag-facemask ang ilang natala nga kalapasan ug lakip sa nasikop ang nakalapas sa liquor ban.

Sumala pa ni Parilla, mohimo sila sa ilang assessment ug ilaha kining isumiter ngadto ni Cebu City Acting Mayor Michael Rama ug sa Emergency Operation Center.

Samtang nanghatag og face mask ingon man face shield ang kapolisan sa Dakbayan sa Talisay ngadto sa mga tawo nga masakpan nga walay proteksyon batok COVID-19.

Ang mga sakop ni Police Lt. Col. Gerard Ace Pelare, pangu sa Talisay City Police Station nipatuman niini sa nagkadaiyang lugar.

Kaniadto, lakip sa dakpon ang mga tawo nga wala magsul-ob og face mask, apan karon panghatagan na sila inay nga dakpon.

Sa operasyon usab sa kapolisan sa Dakbayan sa Lapu-Lapu mokabat sa 197 ka mga tawo ang nadakpan sukad sa pagpatuman (MECQ) status nga nagsugod niadtong Agosto 1, 2021.                 

 Sagad sa mga quarantine violators nga nadakpan mao ang paglapas sa curfew ordinance ug wa pagtuman sa safety protocols.                                      

 Si  Police Colonel  Arnel Banzon nga maoy LCPO direktor miingon nga ang 101  ka mga tawo ilang nadakpan sa paglapas sa ordinansa sa curfew, 75  usab ang nadakpan nga wala magsul-ob og face mask, 11 niini ang nakalapas sa social distancing. —Gabriel C. Bonjoc/Romeo T. Limpangog/MEL (BANATNEWS)