Mga namatay sa COVID-19 prayoridad sa crematoriums

CEBU, Philippines — Nakigtigom kagahapon si Cebu City South District  Councilor David Tumulak sa mga operator og punerarya ug ilang nasabotan nga iprayoridad sa pagpa-cremate karong panahona mao lang kadtong namatay tungod sa COVID19.

Gihangyo nila ang mga tagtungod sa namatay nga dili COVID19 ang rason, nga labing maayo nga dili nalang kini ipa-cremate aron sayo kini malubong. Nasayran nga taas kaayo og linya karong panahona ang mga crematorium.

Tungod sa kadaghang magpa-cremate, maabtan pa og usa ka semana sa dili pa hingpit nga ma-cremate ang patay nga nakadugang sab sa problema sa kakuwangon karon sa freezers nga butangan sa mga patay.

Nagmalaumon hinuon si Tumulak nga mosabot ra gyud ang mga tagtungod sanglit  dili man gyud kapugngan ang maong sitwasyon.

“Among dasigon ang mga tagtungod nga kun dili gani COVID19 ang rason sa kamatayon,  ayaw lang sa ipa-cremate . Priority karong panahona kadtong namatay tungod sa COVID19, “ suma pa ni Tumulak.

Nasayran nga usa  usab sa problema karon ang kapuno na sa mga sementeryo dinhi sa patag. Dunay ubang sementeryo nga mabakante lang kun dunay bukog nga habwaon.

Giklaro hinuon ni Dr. Alice Marie Aycardo, head sa Cebu City Health Cadaver Division nga dili kini ang pagsaka sa kaso COVID-19 ang hinungdan ani tungod kay lahi-lahi ang rason sa gikamatyan sa mga tawo.

Dugang pa niya nga aduna pay bakante nga mga nitso sa mga sementeryo sa kabukiran.— IBM (BANATNEWS)