Lola napaig sa sunog sa Talisay

CEBU, Philippines — Napaig ang usa ka lola human nasunog uban sa ilang panimay diha sa sitio Lower Caduldulan, Barangay Lawaan 3, Dakbayan sa Talisay niadtong Sabado sa gabii.

Ang namatay mao Teonila Echavez, 73, dalaga nga nagpuyo sa maong lugar.

Si Kapitan Frederick Marababol sa Lawaan 3 nagkanayon nga kuyog ni Echavez ang iyang igsuon nga wala sab maminyo diha sa ilang pinuy-anan.

Adunay mga anak sa ilang igsuon nga motapontapon sab nila apan niadtong tungora nipalit og sud-an ang iyang igsuon samtang gisugo sa pagpalit og gas ang ilang apo.

Matud pa ni Marababol nga posibleng nagsugod ang kalayo diha sa mga tinabas nga panapton kay manghimo man sila og trapo ug lamparilya ang gamit sa panuga.

Asoy pa sa opisyal nga dali nga nagtinabangay ang mga molupyo sa pagpawong sa kayo apan wa gyud makagawas si Echavez hangtud nga kini napaig.

Si Chief Insp. Arnel Abella, fire marshal sa siyudad nibutyag nga lakip kini ilang susihon ang alegasyon sa mga tawo. Kay pag-abot sa mga bombero sa lugar napawong na ang kayo.

Si Marababol nitataw nga paspas ang mga molupyo sa pagpawong sa kayo gumikan sa ilang kabalaka nga mokatap kini sa laing panimay.

Ang lugar nasunog na kaniadto atol sa Pasko diin daghang mga panimay ang nangaugdaw.— IBM (BANATNEWS)