Probinsiya mohatag og tag P10 mil nga incentive sa nurses
CEBU, Philippines — Mohatag og P10, 000 nga incentive ang Probinsiya sa Sugbo sa nurses nga gi-hire sa Department of Health-7 aron nga idugang sa manpower sa mga pribadong hospital sa Metro Cebu.
Ang DOH-7 ni-hire na kini og 60 ka nurses nga maoy i-deploy diha sa mga pribadong hospital aron nga motabang pag-atiman sa mga pasyente diha sa COVID-19 wards.
Matud ni Gobernador Gwendolyn Garcia nga andam ang mga private hospital nga mopuno og COVID-19 beds apan ang problema lang kay kulang ang mga medical personnel.
Samtang si Dr. Jaime Bernadas, direktor s DOH-7 nagkanayon ang gihimo nila karon mao ang pag-capacitate sa public hospitals pinaagi sa pagdugang og medical personnel ug pagpadaghan sa bed occupancy aron nga daghan ang maatiman nga pasyente.
Ang Probinsiya sa Sugbo gikataktang mopalit sa sunod semana og 20 ka units sa high- flow machine, usa ka ekipo alang sa mga pasyente sa COVID-19 nga adunay severe nga sintomas.
Ang maong mga ekipo adto ihatag sa upat ka provincial hospital sa Lungsod sa Balamban mga dakbayan sa Carcar, Danao ug Bogo.
Gawas a maong ekipo mopalit usab ang Kapitolyo og dugang medical supplies alang sa mga provincial ug district hospitals.
Matud sa Provincial Health Office nga anaa na sa 500 ang gitagana nga COVID-19 beds sa mga tambalanan nga gidumala sa probinsiya. —BDB (BANATNEWS)
- Latest
