P7M shabu sakmit sa Cebu City ug Talisay

CEBU, Philippines — Mokabat sa P7 milyones ang kantidad sa shabu nga nasakmit gikan sa duha ka lalaki atol sa gipahigayong operasyon sa City Drug Enforcement Unit ug City Intelligence Unit niadtong Martes sa gabii diha sa San Carlos Heights, Barangay Quiot, Dakbayan sa Sugbo.

Ang suspetsado mao sila si Ryan Ravanes, 19-anyos, taga Sitio Lawis, Barangay Pasil ug Henry Bontilao, 39, habal-habal driver, taga Barangay Binaliw.

Sila si Police Major Jonathan Taneo sa CDEU ug Police Lieutenant Colonel Randy Caballes sa CIU ang nangulo sa maong operasyon.

Nasakmit gikan sa mga suspetsado ang usa ka kilo nga shabu nga gibana-banang nibalor ngadto sa P6,900,000 ug buy bust money.

Si Ravanes giingong nitug-an nga sulod na sa upat ka tuig siya sa maong trabaho nga maghatud og ginadiling drugas. Giingong ang contact ni Ravanes nga maoy magsugo kaniya bugti sa P20 mil nga suhol anaa sa sulod sa prisohan.

Samtang si Bontilao nangangkong igo ra siya nagmaneho kang Ravanes.

Si Police Colonel Josefino Ligan, direktor sa Cebu City Director Office nipadayag sa paghangop sa maong achievement sa operatiba.

Matud ni Ligan nga ang maong mga ginadiling drugas susama og marka sa nasakmit atol sa operasyon sa kapolisan diha sa bukirang barangay nga adunay Chinese marker ug giingong ang source anaa gihapon sa prisohan.

Gibutyag ni Ligan nga base sa ilang nadawat nga report si Ravanes bodegero kini.

Sa laing bahin, duha usab ka suspetsadong durugista ang nasikop atol sa buy bust operation sa kapolisan diha sa Sitio Salvador, Barangay Tanke niadtong Martes sa gabii.

Ang nasikop mao sila si Eman Bongo, 32, ulitawo, taga Barangay San Isidro ug Mark Joseph Chavez, 23, ulitawo, taga Barangay Biasong sa nahisgutang Syudad.

Nasakmit gikan sa mga suspetsado ang 15.25 gramos nga shabu nga gibana-banang nikantidad ngadto sa P103,700.— Gabriel C. Bonjoc/BDB (BANATNEWS)