Chan mihatag og katin-awan sa gipagawas nga EO

CEBU, Philippines — Dili angayan nga mabalaka ang katawhan sa Dakbayan sa Lapu-Lapu sa Executive Order nga giluwatan ni Mayor Junard Ahong Chan nga magdili na unya sa mga Oponganon nga maka-adto sa mga publiko ug pribadong lugar kun wa pa kini nabakunahan.

Gipasabot sa mayor nga ang section 4 sa iyang EO no. 2021- 040 nga nag-ulohan og "Presentation of vaccination cards in public and private markets, supermarkets convenience stores nga moepekto unya pa sa Agosto 25, 2021.

“Ang akong panawagan, magpabakuna ta. Nothing to worry for the section 4, why? Dili pa ni siya i-implement karon. They are given 30 days, August 25 pa. So no need to react. What is the most important let us see kining atoang vaccination ug pila na kadaghan, tan-awon pod nato ang atong cases, atong i-balanse kung angayan bang i-extend ang August 25 or i-lift ang section 4,” dugang pagpasabot ni Mayor Chan

Nalatid sa section 4 sa Executive Order ni Chan nga kinahanglan ang pagpresentar sa vaccination card sa mga tawo nga moadto sa merkado, apil na niini sa department stores, supermarkets, grocery stores ug convenience stores.

Una niini daghan ang mi-react sa maong EO tungod kay matud pa nahimo nang pinugsanay ang vaccination.  Nunot niini si Mayor Chan naghangyo sa publiko sa pagsabot ilabi na kun magpadayon ang pagsaka sa kaso sa coronavirus disease sa dakbayan.

Samtang gitugot na ni Mayor Chan nga modawat og walk-in sa magpabakuna ang nagkadaiyang vaccination site sa Dakbayan sa Lapu-Lapu. Si Mayor Chan nakahukom niining maong lakang aron ang mga senior citizen mahimo nga moadto na lamang sa mga vaccination site.

Kini human usab naguba ang ilang computer nga maoy hinungdan sa kalangan tungod kay bisan ang mga na-fully vaccinated na nakadawat gihapon og text sa ilang skedyul. —MEL (BANATNEWS)