Dugang mga lungsod mi-estrikto na sa protocols

CEBU, Philippines — Dugang mga lungsod sa lalawigan sa Sugbo ang nipatuman balik og "restriction" sa health protocols tungod sa padayon nga pagsaka sa coronavirus disease sa ilang mga lungsod.

Ang lungsod sa Moalboal, Ginatilan, Balamban ug Borbon nipagawas og Executive Orders (EO) pag strikto pagpatuman sa health protocols. Ang maong mga lungsod nga puros anaa sa Modified General Community Quarantine (MGCQ nimando sa temporaryo nga pag sarado sa mga internet cafes.

Gidili na usab ang pagpagawas sa minorde edad o kadtong mga 15 anyos paubos. Sa Ginatilan, si Mayor Dean Michael Singco ni issue og EO-4 pagpatuman og curfew sugod alas 8 sa gabii. Gibawal usab ang panagtapok sama sa kasal, birthday, karaoke sessions ug beach parties.

Ang mga restaurants gibawalan nga mag dine-in. Epektibo kini Hulyo 28 hangtod Agosto 3.

Sa  Moalboal si Mayor Paz Rizgoni ni issue og EO No. 29  nga nag mando sa  pagpatuman sa curfew alas 10 sa gabii hangtod alas 5 sa buntag.

Aduna usab liquor ban nga ipatuman sa mga pampubliko nga lugar, magsugod kini karong adlawa, July 29, 2021.

Sa Borbon, aduna usab liquor ban nga ipatuman. Ibawal ang panagtapok, temporaryong gipasirad-an ang mga resorts ug kanselado ang outdoor sports activities. Ang maong kamandoan moepekto sa Agosto 2 hangtod sa Agosto 11, 2021.

Samtang gihulagway ni Dr. Lino Alanzado sa Talisay City Health Office nga alarming ang 20 ka tawo nga magpositibo sa COVID-19 matag adlaw sa Dakbayan sa Talisay

Siya nagkanayon nga ang ilang ambulansya maabtan og unom ngadto sa 14 ka oras una mabalik nga gikan maghatud og pasyenti sa tambalanan sa Dakbayan sa Sugbo.

Ang Talisay nakatala na og 195 ka aktibong kaso. —Gabriel C. Bonjoc/MEL (BANATNEWS)