Lapu-Lapu, Mandaue naghigpit na sab

CEBU, Philippines — Human naghigpit ang Cebu City, ang Mandaue City ug Lapu-Lapu City naghigpit sab karon tungod sa nagsaka sab nga mga kaso sa coronavirus diha sa ilang hurisdiksyon. Si Mayor Jonas Cortes miluwat og Executive Order Number 22  series of 2021 diin iyang gibalik ang pagpatuman ang liquor ban, estriktong pagbantay sa border control, pagdili sa non-essential public gatherings ug gilugwayan usab ang oras sa curfew sa mga molupyo gikan sa alas 10  sa gabii hangtod sa alas 4 ang takna sa buntag. Molungtad kini og usa ka bulan sugod kagahapong adlawa.

Hinuon exempted sa liquor ban ang mga hotel, resorts ug uban pang accommodation establishments. Ang makalapas niini posibleng bawian og permit ug masirad-an.

Samtang sa Lapu-Lapu City, si Mayor Junard ‘Ahong’ Chan miluwat sab og Executive Order Number 2021-040 nga nibalik sab sa pipila ka restriksyon sama sa gihimo sa Mandaue City ug Cebu City epektibong nagsugod Hulyo 26, 2021 hangtod sa Agosto 25, 2021.

Apil sa gidili ang contact ug non-contact sports ug ang tanan nga non-essential mass gathering.

Gitugotan hinuon nga makapalit og ilimnong makahubog apan adto lamang kini imnon sa sulod sa ilang panimalay

Apan ang Section 4 sa maong EO maoy miani og daghang pagsaway gikan sa mga molupyo sa maong siyudad. Kini nagmando nga sugod Agosto 25, kinahanglang makapresentar og vaccination cards kadtong mosud sa merkado publiko, supermarkets, convenient stores ug department stores. Ang dili makapakita niini dili tugotang makasulod.

Una niini, si IATF Visayas Chief Implementer Carlito Galvez Jr. miawhag sa mga mayor sa Cebu City, Lapu-Lapu City ug Mandaue City nga parehason ang ilang guidelines sa health protocols. —IBM (BANATNEWS)