Chan mialigar nga dunay mipugong sa iyang proyekto

CEBU, Philippines — Gi-aligar ni Mayor Junard Ahong Chan nga iyang namatikdan nga mibabag sa proyekto sa iyang administrasyon si Konsehal Rico Amores.                               

Naglakip sa proyekto nga gibabagan mao ang ipatuman unta nga socialized housing program, ug ang pagpalit unta og airconditioning unit alang sa Lapu-Lapu City Hospital.

"Nakapanukad na unta kita, nagsugod na kita og pupo sa bunga sa kausaban nga atong gilaraw. Pero subo lang kay niadtong milabay nga Huwebes, panahon sa session sa konseho sa dakbayan, diin mipadayag si Konsehal Amores sa iyang mga kauban nga gubat na kini," tipik sa Facebook post ni Mayor Chan.

Hinuon si Konsehal Amores sa iyang tubag mihimakak sa pasangil sanglit wala kini igong kapasidad sa paghimo niini.                             

Misumbalik usab pagpasangil si Konsehal Amores ngadto kang Mayor Chan nunot sa pag-terminate sa iyang 11 ka mga job orders ug casual nga mga kawani.                     

Si Amores maoy chairman sa committee on environment, education ug games and amusement board.                                 

Gitataw ni Konsehal Amores  nga si Konsehal Flaviano Hiyas nga maoy chairman sa committee on finance maoy nag-awhag sa deferment sa pagpalit og air conditioning unit sa LLCH tungod kay nagpatuman pa man kini og reorganization sa committee chairmanship sa ilang regular session niadtong Hulyo 22, 2021.                       

Samtang si Konsehal Epoy Paquibot nga maoy chairman sa committee on laws mao usab ang nag-awhag sa deferment sa socialized housing project sa Barangay Canjulao.            

Gitataw ni Konsehal Amores nga walay nagbabag sa maong proyekto sanglit wala man i-deny ang request nga pagpalit og aircon ug ingon ang socialized housing niini. —MEL (BANATNEWS)