Sobra sa 1,000 nga nakalapas sa protocols ug balaod nasikop

CEBU, Philippines — Sobra sa 1,000 ka malapason sa health protocols ang nasikop sa Dakbayan sa Sugbo gikan sa Hulyo 19, 2021 ngadto sa 25, 2021.

Kini ang gibutyag ni Police Lieutenant Colonel Wilbert Parilla, deputy city director for operation sa Cebu City Police Office. Matud ni Parilla nga 871 ka adults ang nadakpan ug 338 ka minors ang nakalapas sa mga gipatuman nga balaod sa siyudad ilabi na nga anaa pa ang COVID-19.

Niabot ngadto sa 1,200 ka violators ang nadakpan diin kasagaran niini nakalapas sa curfew.

Gibutyag ni Parilla nga niabot usab sa 217 ang nakalapas tungod kay wala kini magsul-ob ogg facemask.

Samtang sa Dakbayan sa Talisay, niabot sa 33 ka tawo ang nadakpan sa kapolisan sa ilang gihimo nga Simultaneous Anti-Criminality Law Enforcement Operation (SACLEO) niadtong Sabado.

Si Police Lieutenant Colonel Gerard Ace Pelare nagkanayon nga ilang gihimo ang lapad nga operasyon batok sa tanang matang sa kriminalidad.

Sa ilang operasyon, siyam ang ilang nadakpan batok ginadiling drugas diin nasakmitan kini og 5.4 gramos nga shabu, duha ang nadakpan sa ilegal nga sugal, tulo ang nasikop pinaagi sa warrant of arrest, usa sa Oplan Katok ug 19 ang nadakpan batok sa kalapasan sa lagda sa trapiko.

Sa laing bahin, gitinguha karon sa kagamhanan  sa Dakbayan sa Mandaue sa pagbutang og discipline zones sa nagkadaiyang dapit niini.

Nunot sa maong tinguha giplano ni Mayor Jonas Cortes ang pag-establisar og discipline zone diha sa nagkadaiyang lugar diin ang mga balaod, mga executive order ug mga ordinansa sa siyudad ang higpit nga mapatuman

Si Cortes gikatakdang makigtagbo kang Edwin Jumao-as, executive director sa Traffic Enforcement Agency of Mandaue (TEAM) alang sa pagtuki sa iyang plano.

Gitinguha usab ni Cortes ang pagsangpit sa nagkadaiyang pundok nga nagsilbing force multipliers sa pagtabang nga mapatuman ang mga gilatid nga balaod ug mga lagda nga gipatuman sa kagamhanan. Gabriel C. Bonjoc ug RomeoT.  Limpangog/BDB (BANATNEWS)