Siyudad nagtinguha nga bakunahan ang tanang seniors
CEBU, Philippines — Gisugdan na kagahapon sa Cebu City Government ang pagbakuna sa Johnson and Johnson vaccine, nga gitagana alang sa mga senior citizens diha sa NOAH Complex.
Nasayran ang siyudad nakadawat og 14,800 doses sa maong matang sa vaccine batok sa COVID-19 nga naggikan sa Janssen Pharmaceutical nga nagbase sa Estados Unidos.
Matod ni Dr. Jeffrey Ibones, Officer-in-Charge sa Cebu City Health Department nga mokabat lang sa 27,000 ka mga senior citizens sa dakbayan ang nabakunahan.
Tinguha sa siyudad nga mabakunahan ang tanang senior citizen, diin base sa record sa Office of the Senior Citizen Affairs(OSCA) ang Cebu City dunay 88,000 registered senior citizens.
Si Vice mayor Michael Rama kinsa maoy acting mayor nagkanayon padayon sila nihimo og mga lakang aron pagkumbinsir sa mga senior citizens nga magpabakuna kontra COVID-19.
Tumong sa siyudad nga moabot sa 1000 ngadto sa 1,500 ka mga senior citizens ang mabakunahan sa maong matang sa bakuna.
samtang laing vaccination sites ang giablihan alang sa first dose sa Sinovac sama sa University of Cebu City Senior Highschool building sa J. Alcantar Street Barangay Sambag 1 ug sa Banilad Campus.
Samtang sa laing bahin nihangyo si Mayor Gerald Anthony “Samsam” Gullas sa mga Talisaynon nga adto lang ihatag ang bakuna nga Johnson and Johnson sa mga senior citizen. Base usab kini sa tambag sa Visayas Vaccination Operation Center sanglit usa ra ka dose ang iturok niini.
Gidugang ni Mayor Gullas nga daghan na ang gusto magpabakuna sa ilang siyudad apan giagad nila ang mga bakuna nga ihatag sa Department of Health (DOH) ug ang vaccination site nga makasigo sa gidaghanon sa magpabakuna. Gabriel C. Bonjoc/MEL (BANATNEWS)
- Latest
